Bayram arafasida bu yil ko‘pchilik bolalar bog‘chalarida yangi yil bayrami o‘tkazilmasligi haqida mish-mishlar tarqala boshlagan edi. O‘zbekiston Xalq ta’limi vazirligi matbuot kotibi Bahriddin Shayvaliyev maktabgacha ta’lim muassasalarida (MTM) yangi yil tadbirlarini o‘tkazishni taqiqlash to‘g‘risida vazirlikda hech qanday topshiriq bo‘lmaganini ma’lum qildi, deb xabar bermoqda “Podrobno.uz”.
“Podrobno.uz” aniqlik kiritishicha, 2009-yil 14-mayda Adliya vazirligi tomonidan tasdiqlangan “Maktabgacha ta’lim muassalarida bolalar himoyasi va salomatligi to‘g‘risidagi” nizomga binoan, MTMlarda yangi yil tadbirlarini o‘tkazish uchun dastlab tuman yong‘in xavfsizlik xizmatidan tadbir o‘tkaziladigan joyning yong‘in xavfsizligi qoidalariga mosligi haqida ruxsat olish lozim.
Bundan tashqari ota-onalar qo‘mitasi yig‘ilishini o‘tkazib, ularning roziligi bilangina bayram tadbirini tashkillashtirish mumkin. Ota-onalardan pul yig‘ish taqiqlangan bo’lib, faqat ko‘ngilli ravishda tadbirni tashkillashtirish mumkin. Mablag‘ archa, qorbobo yoki qorqizni taklif qilishga sarflanishi mumkin. Aynan kimni taklif qilishni ota-onalar qo‘mitasi hal qiladi. Eng asosiysi, yangi yil bayrami shunchaki sovg‘alarni tarqatish va ziyofatgina emas, balki turli viktorina va tanlovlarga boy tarbiyaviy-ma’rifiy tadbir sifatida o‘tkazilishi tavsiya qilingan.
“Podrobno.uz” suhbatdoshining ma’lum qilishicha, so‘nggi vaqtlarda unga bolalar bog‘chalaridagi yangi yil bayrami uchun 50 ming so‘mdan pul yig‘ilishi taklif qilinganidan noligan ota-onalar arz qilgan va bu holatga barham berishni so‘ragan. Bunday vaziyatlar ota-onalar qo‘mitasida sodir bo‘lgani uchun ushbu MTMlarga har bir ota-ona o‘z imkoniyatidan kelib chiqib sovg‘a olishi belgilangan tadbirlar tashkillashtirish tavsiya qilingan.