Самарқанд вилояти Нуробод тумани ҳокими ўз вазифасидан озод этилди

9 декабрь куни халқ депутатлари Нуробод тумани кенгашининг навбатдан ташқари сессияси бўлиб ўтди, дея хабар бермоқда Самарқанд вилоят ҳокимлиги расмий сайти. Сессияда вилоят ҳокими З.Мирзаев иштирок этди ва маъруза қилди.

Вилоят ҳокими туманнинг вилоят ижтимоий-иқтисодий, маданий-маърифий ҳаётида муҳим ўрин тутишини қайд этиб, кейинги йилларда ҳудудда барча соҳаларда амалга оширилаётган ислоҳотлар, хусусан туман маркази ва қишлоқларнинг обод бўлиб бораётгани, аҳоли турмуш фаровонлигининг ошаётганида ўз аксини топаётганини таъкидлади.

Жорий йилнинг ўтган даврида туманда саноат маҳсулотлари ишлаб чиқариш 11,3 миллиард сўмни ташкил қилди. Бу ўтган йилга нисбатан 15,7 фоизга ўсган, демакдир. Истеъмол маҳсулотлари ишлаб чиқариш 114 фоиз, қишлоқ хўжалик маҳсулотлари етиштириш 107 фоиз, чакана савдо 115,1 фоизни ташкил этди.

Саноат салоҳиятини ошириш дастурига асосан 1 миллиард 578 миллион сўм маблағ жалб қилиниб, 14 та инвестицион лойиҳа амалга оширилди. 37 та кичик бизнес субъектлари очилиб, уларнинг жами сони 418 тага етди.

Тадбиркорлик субъектларига 8,1 миллиард сўмлик кредитлар ажратилди.

Мева-сабзавот, полиз маҳсулотлари, гўшт, сут, тухум ишлаб чиқариш бўйича ҳам белгиланган режалар уддаланди.

Шунингдек, сессияда фаоллар иштирокида Нуробод туманида амалга оширилиши керак бўлган ишлар ва айрим муаммолар таҳлил этилди.

Сессияда ташкилий масала кўрилди. Жамол Хайруллаевич Ибрагимов ўз аризасига кўра туман ҳокими вазифасидан озод этилди.

Шу пайтгача туман ҳокимининг биринчи ўринбосари вазифасида ишлаб келаётган Бахтиёр Қўшбоевич Эргашев, вилоят ҳокимининг тавсиясига кўра, Нуробод тумани ҳокими вазифасини бажарувчи этиб тасдиқланди.