Тошкент шаҳрининг Юнусобод туманида «SOS – Ўзбекистон болалар маҳаллалари» уюшмасининг иккинчи Ёшлар уйи ташкил этилди, деб хабар бермоқда Ўзбекистон Миллий ахборот агентлиги.
Мазкур муассасанинг очилишига бағишланган тадбирда турли вазирлик ва идоралар, жамоат ташкилотлари вакиллари, педагоглар, талаба-ёшлар иштирок этди.
Ўзбекистон Касаба уюшмалари федерацияси кенгаши раиси Т. Норбоева, Тошкент шаҳар ҳокимининг ўринбосари, шаҳар хотин-қизлар қўмитаси раиси Ф. Абдураҳимова ва бошқалар Президентимиз Ислом Каримов раҳнамолигида болаларнинг ҳуқуқ ва манфаатларини таъминлаш, уларни ҳар жиҳатдан соғлом ва баркамол инсонлар бўлиб вояга етиши, ўзи қизиққан соҳалар бўйича касб-ҳунар эгаллаши, интеллектуал салоҳиятини ўстириши масаласига давлат сиёсатининг устувор йўналиши сифатида эътибор қаратилаётганини таъкидлади.
«SOS – Ўзбекистон болалар маҳаллалари» уюшмасининг иккинчи Ёшлар уйи Юнусобод туманининг «Шаҳристон» маҳалла фуқаролар йиғини ҳудудида жойлашган бўлиб, Тошкент шаҳар ҳокимлиги ҳомийлигида ташкил этилди. Бу ерда ўсмирларнинг 16 ёшдан кейинги давр мобайнида яшаши, ҳаётий мослашуви, уларни маънавий, ижтимоий-ҳуқуқий, психологик қўллаб-қувватлаш учун муайян муддатли ёрдам кўрсатиш тизими йўлга қўйилган.
Уюшма таркибидаги биринчи Ёшлар уйи 2009 йилда Чилонзор туманида ташкил этилган бўлиб, эндиликда унинг 30 нафардан ортиқ тарбияланувчиси ўз мустақил ҳаётини йўлга қўйишга муваффақ бўлди.
Ёшлар уйи умумий таълим масканларини тамомлаган ва илк мустақил ҳаётни бошлаётган ўсмирлар учун мўлжалланган. «SOS – Болалар маҳалласи»дан бу масканга кўчирилган ўсмирларга юқори малакали мутахассислар, педагоглар, мураббийлар, психологлар кўмагида илк мустақил ҳаётга оид билим ва кўникмалар, касб танлаш, ишга жойлашиш, шахсий салоҳиятни ривожлантиришга оид билимларни пухта эгаллашга яқиндан кўмаклашилади. Бу ерда ўсмир ёшдаги ўғил-қизлар жамоа билан мулоқотда бўлиш, ўз маблағларини тўғри режалаштириш, рўзғор ва хўжалик ишларини оқилона юритишга ўрганади.
«Ўзбекистон халқаро ташкилотимизга аъзо бўлган давлатлар орасида болаларга эътибор ва ғамхўрлик кўрсатиш бўйича энг намунали фаолият кўрсатаётган мамлакат. Юртингизда болалар таълим-тарбиясига тааллуқли ҳар бир лойиҳа пухта ва жиддий ёндашув асосида, вазирлик ва идоралар, жамоат ташкилотларининг кучли ижтимоий ҳамкорлигига таянган ҳолда амалга оширилиши ушбу муваффақиятнинг асосий омилидир», – деди SOS Children’s Villages Internatoinal халқаро ташкилоти вакили Зденко Седлар.
Ёшлар уйида замонавий ускуна ва жиҳозлар билан таъминланган дам олиш, машғулот, спорт-соғломлаштириш, компутер хоналари, кутубхона, ошхона мавжуд.
«Мамлакатимизда ёшларга кўрсатилаётган улкан эътибор ва ғамхўрлик бизни беҳад руҳлантиради. Қаратилаётган чексиз меҳр ва эътибор, яратилаётган шароитларнинг қадрига етишга, халқимизга, Ватанимизга муносиб инсонлар бўлиб вояга етишга астойдил интиламиз», − деди бу ерда истиқомат қилаётган 16 нафар ёшдан бири Беҳзод Исмоилов. У дастлаб пойтахтимиздаги 49-умумтаълим мактабини, сўнгра коллежни тамомлаб, ҳозир Ўзбекистон давлат санъат ва маданият институтида таҳсил олади.
Изоҳ (0)