Toshkent shahrining Yunusobod tumanida “SOS – O‘zbekiston bolalar mahallalari” uyushmasining ikkinchi Yoshlar uyi tashkil etildi, deb xabar bermoqda O‘zbekiston Milliy axborot agentligi.
Mazkur muassasaning ochilishiga bag‘ishlangan tadbirda turli vazirlik va idoralar, jamoat tashkilotlari vakillari, pedagoglar, talaba-yoshlar ishtirok etdi.
O‘zbekiston Kasaba uyushmalari federatsiyasi kengashi raisi T. Norboyeva, Toshkent shahar hokimining o‘rinbosari, shahar xotin-qizlar qo‘mitasi raisi F. Abdurahimova va boshqalar Prezidentimiz Islom Karimov rahnamoligida bolalarning huquq va manfaatlarini ta’minlash, ularni har jihatdan sog‘lom va barkamol insonlar bo‘lib voyaga yetishi, o‘zi qiziqqan sohalar bo‘yicha kasb-hunar egallashi, intellektual salohiyatini o‘stirishi masalasiga davlat siyosatining ustuvor yo‘nalishi sifatida e’tibor qaratilayotganini ta’kidladi.
“SOS – O‘zbekiston bolalar mahallalari” uyushmasining ikkinchi Yoshlar uyi Yunusobod tumanining “Shahriston” mahalla fuqarolar yig‘ini hududida joylashgan bo‘lib, Toshkent shahar hokimligi homiyligida tashkil etildi. Bu yerda o‘smirlarning 16 yoshdan keyingi davr mobaynida yashashi, hayotiy moslashuvi, ularni ma’naviy, ijtimoiy-huquqiy, psixologik qo‘llab-quvvatlash uchun muayyan muddatli yordam ko‘rsatish tizimi yo‘lga qo‘yilgan.
Uyushma tarkibidagi birinchi Yoshlar uyi 2009-yilda Chilonzor tumanida tashkil etilgan bo‘lib, endilikda uning 30 nafardan ortiq tarbiyalanuvchisi o‘z mustaqil hayotini yo‘lga qo‘yishga muvaffaq bo‘ldi.
Yoshlar uyi umumiy ta’lim maskanlarini tamomlagan va ilk mustaqil hayotni boshlayotgan o‘smirlar uchun mo‘ljallangan. “SOS – Bolalar mahallasi”dan bu maskanga ko‘chirilgan o‘smirlarga yuqori malakali mutaxassislar, pedagoglar, murabbiylar, psixologlar ko‘magida ilk mustaqil hayotga oid bilim va ko‘nikmalar, kasb tanlash, ishga joylashish, shaxsiy salohiyatni rivojlantirishga oid bilimlarni puxta egallashga yaqindan ko‘maklashiladi. Bu yerda o‘smir yoshdagi o‘g‘il-qizlar jamoa bilan muloqotda bo‘lish, o‘z mablag‘larini to‘g‘ri rejalashtirish, ro‘zg‘or va xo‘jalik ishlarini oqilona yuritishga o‘rganadi.
“O‘zbekiston xalqaro tashkilotimizga a’zo bo‘lgan davlatlar orasida bolalarga e’tibor va g‘amxo‘rlik ko‘rsatish bo‘yicha eng namunali faoliyat ko‘rsatayotgan mamlakat. Yurtingizda bolalar ta’lim-tarbiyasiga taalluqli har bir loyiha puxta va jiddiy yondashuv asosida, vazirlik va idoralar, jamoat tashkilotlarining kuchli ijtimoiy hamkorligiga tayangan holda amalga oshirilishi ushbu muvaffaqiyatning asosiy omilidir”, – dedi SOS Children’s Villages Internatoinal xalqaro tashkiloti vakili Zdenko Sedlar.
Yoshlar uyida zamonaviy uskuna va jihozlar bilan ta’minlangan dam olish, mashg‘ulot, sport-sog‘lomlashtirish, komputer xonalari, kutubxona, oshxona mavjud.
“Mamlakatimizda yoshlarga ko‘rsatilayotgan ulkan e’tibor va g‘amxo‘rlik bizni behad ruhlantiradi. Qaratilayotgan cheksiz mehr va e’tibor, yaratilayotgan sharoitlarning qadriga yetishga, xalqimizga, Vatanimizga munosib insonlar bo‘lib voyaga yetishga astoydil intilamiz”, − dedi bu yerda istiqomat qilayotgan 16 nafar yoshdan biri Behzod Ismoilov. U dastlab poytaxtimizdagi 49-umumta’lim maktabini, so‘ngra kollejni tamomlab, hozir O‘zbekiston davlat san’at va madaniyat institutida tahsil oladi.
Izoh (0)