Ўзбекистон минтақа инфратузилмасини қуришда ва мустаҳкамлашда асосий ролни ўйнайди. Бу ҳақда АҚШ Давлат котибининг Жанубий ва Марказий Осиё бўйича ёрдамчиси Ниша Десаи Бисвал 2 декабрь куни Тошкентда бўлиб ўтган матбуот анжуманида айтиб ўтди, деб ёзади «Туркистон-пресс» ахборот агентлиги.
Нашрнинг эслатишича, Ниша Десаи Ўзбекистонга икки томонлама сиёсий консультацияларнинг навбатдаги даврасини ўтказиш учун 30 ноябрь куни ташриф буюрган эди. Матбуот анжумани унинг Ислом Каримов билан учрашувидан сўнг ўтказилди.
«Қуруқлик билан ўралган давлат сифатида Ўзбекистон Марказий Осиёнинг юраги кабидир, у цивилизациялар чорраҳасида жойлашган бой тарихга эга давлатдир. Бугунги кунда Ўзбекистон минтақадаги давлатлар инфратузилмасини, шунингдек улар ўртасидаги ўзаро алоқаларни қуриш ва мустаҳкамлашда муҳим рол ўйнайди», — дея таъкидлади Ниша Десаи Бисвал.