Миржалол Қосимов «Seongnam»да тўп сураётган Cервер Жепаровнинг Тошкент йиғинига келишига шубҳа билдирди

Ўзбекистон миллий терма жамоаси келаси ҳафтада ўқув-назорат йиғинини ўтказиш учун БААга йўл олади. Ушбу йиғинда бир қатор легионерларнинг сафга келиб қўшилиши кутилмоқда. Миллий терма жамоа бош мураббийи Миржалол Қосимов бу борада, шунингдек, тажрибали ярим ҳимоячи Одил Аҳмедовнинг Россия премьер-лигаси доирасидаги ўйинда олган жароҳати ҳақида тўхталиб ўтди, деб хабар беради «Uff.uz».

Миржалол Қосимов Одил Аҳмедовнинг жароҳати ҳақида гапирар экан,  «Краснодар»да шароитлар жуда яхшилиги, тиббиёт хизмат ҳам Европа даражасида эканлигини, шу боис Одилнинг бирор жойга бориб, даволаниши шарт эмаслигини, Аҳмедов учун ўз клубида ҳамма шароитлар яратиб берилганини айтди.

Мураббий Тошкентда ўтказилаётган терма жамоа йиғинига 1 декабрда Анзур Исмоилов ва Темур Кападзе келиб қўшилишини, Cервер Жепаров борасида эса вазият бироз ноаниқ бўлиб турганини қайд этди: «Cервер ‘Seongnam’ билан Жанубий Корея кубогини қўлга киритди. Унга қўнғироқ қилиб, ғалаба билан табрикладим. Жепаров келаси ҳафтадаёқ терма жамоа йиғинига етиб келишни жуда истамоқда.

Аммо гап шундаки, айни вақтда ‘Seongnam’ Жанубий Корея чемпионатида бироз қийин аҳволга тушиб қолган. Клуб гарчи кубок соҳибига айланган бўлса-да, чемпионатда қуйи лигага тушиб кетмаслик учун кураш олиб бормоқда.

Агар ‘Seongnam’ кейинги турларда ғалабага эришса, Cервер борасида ҳеч қандай муаммо бўлмайди. Аммо керакли натижа қайд эта олмаса, элитада қолиш учун қўшимча учрашувлар ўтказиши лозим бўлади. Бундай ҳолатда Cервер Жепаров фақат 12 декабрда терма жамоа ихтиёрига етиб келиши мумкин.

Умид қиламизки, ‘Seongnam’ барчасини тезда ҳал қилади ва футболчини терма жамоа ихтиёрига қўйиб юборади».