Mirjalol Qosimov “Seongnam”da to‘p surayotgan Server Jeparovning Toshkent yig‘iniga kelishiga shubha bildirdi

O‘zbekiston milliy terma jamoasi kelasi haftada o‘quv-nazorat yig‘inini o‘tkazish uchun BAAga yo‘l oladi. Ushbu yig‘inda bir qator legionerlarning safga kelib qo‘shilishi kutilmoqda. Milliy terma jamoa bosh murabbiyi Mirjalol Qosimov bu borada, shuningdek, tajribali yarim himoyachi Odil Ahmedovning Rossiya premyer-ligasi doirasidagi o‘yinda olgan jarohati haqida to‘xtalib o‘tdi, deb xabar beradi “Uff.uz”.

Mirjalol Qosimov Odil Ahmedovning jarohati haqida gapirar ekan,  “Krasnodar”da sharoitlar juda yaxshiligi, tibbiyot xizmat ham Yevropa darajasida ekanligini, shu bois Odilning biror joyga borib, davolanishi shart emasligini, Ahmedov uchun o‘z klubida hamma sharoitlar yaratib berilganini aytdi.

Murabbiy Toshkentda o‘tkazilayotgan terma jamoa yig‘iniga 1-dekabrda Anzur Ismoilov va Temur Kapadze kelib qo‘shilishini, Server Jeparov borasida esa vaziyat biroz noaniq bo‘lib turganini qayd etdi: “Server ‘Seongnam’ bilan Janubiy Koreya kubogini qo‘lga kiritdi. Unga qo‘ng‘iroq qilib, g‘alaba bilan tabrikladim. Jeparov kelasi haftadayoq terma jamoa yig‘iniga yetib kelishni juda istamoqda.

Ammo gap shundaki, ayni vaqtda ‘Seongnam’ Janubiy Koreya chempionatida biroz qiyin ahvolga tushib qolgan. Klub garchi kubok sohibiga aylangan bo‘lsa-da, chempionatda quyi ligaga tushib ketmaslik uchun kurash olib bormoqda.

Agar ‘Seongnam’ keyingi turlarda g‘alabaga erishsa, Server borasida hech qanday muammo bo‘lmaydi. Ammo kerakli natija qayd eta olmasa, elitada qolish uchun qo‘shimcha uchrashuvlar o‘tkazishi lozim bo‘ladi. Bunday holatda Server Jeparov faqat 12-dekabrda terma jamoa ixtiyoriga yetib kelishi mumkin.

Umid qilamizki, ‘Seongnam’ barchasini tezda hal qiladi va futbolchini terma jamoa ixtiyoriga qo‘yib yuboradi”.