Россия Федерацияси президенти Владимир Путин Хитой Халқ Республикаси раиси Си Цзиньпинга Россияда ишлаб чиқарилган YotaPhone смартфонини совға қилди. Бу ҳақда Путиннинг матбуот котиби Дмитрий Песковга таяниб, Mail.ru хабар берди.
Путин смартфонни Хитойдаги учрашув доирасида ҳадя қилган. Смартфонга Россия, Хитой ва Осиё-Тинч океани иқтисодий иттифоқи рамзлари юкланган бўлган.
Смартфоннинг янги модели яқинда Сочидаги ёпиқ намойишда тақдим этилди.
Эслатиб ўтамиз, ушбу қурилманинг ўзига хос жиҳати смартфоннинг оддий экранидан ташқари, унинг орқа томонида электрон сиёҳ технологиясида ишланган оқ-қора дисплей борлигидир. Бу уни китоб ўқиш қурилмаси сифатида ишлатиш имконини беради. Шу билан бирга, сиёҳли экранда асосий экранга чиқадиган маълумотлар ҳам акс этади.
Россиянинг Yota Devices компанияси ўзи ишлаб чиққан YotaPhone смартфонининг илк моделини ўтган йил охирида тақдим этган эди. Yota Devices’нинг миноритар акционери бўлган «Ростех» корпорацияси раҳбари Сергей Чемезов янги телефонни Россия бош вазири Дмитрий Медведевга намойиш қилган, қурилма «100% Россия маҳсулоти» эканини маълум қилганди. Кейинроқ Чемезов ушбу телефонларнинг Сингапурда йиғилиши, экранлари Хитой ва Японияда ясалишини таъкидлаб, ўз маълумотига тузатиш киритганди.
Изоҳ (0)