Тошкентда «Камолот» ёшлар ижтимоий ҳаракати ва бир қатор ташкилотлар ташаббуси билан суратга олинган «Катта ҳовли» фильми ижодкорлари иштирокида матбуот анжумани бўлиб ўтди, деб хабар бермоқда Ўзбекистон Миллий ахборот агентлиги.
Давлатимиз раҳбарининг шу йил 6 февралдаги «Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида»ги қарори ижроси юзасидан суратга олинган мазкур фильмда халқимизнинг миллий урф-одатлари, истиқлол ато этган бебаҳо неъматлар, ёшларни қўллаб-қувватлаш борасидаги салмоқли ўзгаришлар, улар қўлга киритаётган ютуқлар ҳақида ҳикоя қилинади.
Картинада Аччиқтош қишлоғидаги ёшу қарининг меҳнацеварлиги, аҳиллиги, анъана ва қадриятларимизга содиқлиги ифодаланган. Фильмда мамлакатимиз катта оила сифатида талқин этилган бўлиб, шу заминда яшаётган барча фуқаролар жонкуярлиги, фидойилиги, бунёдкорлик ишлари билан юрт равнақи, аҳоли фаровонлигига ўз ҳиссасини қўшиши кераклиги ҳақидаги ғоя илгари сурилган. Zero, фильмдан кўзланган асосий мақсад ҳам баркамол авлод таълим-тарбияси, маънавий-маърифий соҳаларда амалга оширилаётган ислоҳотларнинг мазмун-моҳиятини ёшларга тушунтириш, уларни она Ватанга муҳаббат, истиқлол ғояларига садоқат руҳида камол топтиришдир.
Фильм сценарийи муаллифи ва постановкачи режиссёри – Нилуфар Иброҳимхўжаева, постановкачи оператор – Дилмурод Турдибоев, постановкачи рассом – Баҳриддин Шамсиддинов, адабий маслаҳатчи – Нигора Назарова, бадиий раҳбар – Аюб Шаҳобиддинов. Асосий ролларни Ўзбекистон халқ артисти Муҳаммадсоли Юсупов, Ўзбекистонда хизмат кўрсатган артист Фарҳод Абдуллаев, актёрлар Толиб Ҳожиев, Акбархўжа Расулов ва бошқалар ижро этган.
Изоҳ (0)