Toshkentda “Kamolot” yoshlar ijtimoiy harakati va bir qator tashkilotlar tashabbusi bilan suratga olingan “Katta hovli” filmi ijodkorlari ishtirokida matbuot anjumani bo‘lib o‘tdi, deb xabar bermoqda O‘zbekiston Milliy axborot agentligi.
Davlatimiz rahbarining shu yil 6-fevraldagi “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarori ijrosi yuzasidan suratga olingan mazkur filmda xalqimizning milliy urf-odatlari, istiqlol ato etgan bebaho ne’matlar, yoshlarni qo‘llab-quvvatlash borasidagi salmoqli o‘zgarishlar, ular qo‘lga kiritayotgan yutuqlar haqida hikoya qilinadi.
Kartinada Achchiqtosh qishlog‘idagi yoshu qarining mehnatsevarligi, ahilligi, an’ana va qadriyatlarimizga sodiqligi ifodalangan. Filmda mamlakatimiz katta oila sifatida talqin etilgan bo‘lib, shu zaminda yashayotgan barcha fuqarolar jonkuyarligi, fidoyiligi, bunyodkorlik ishlari bilan yurt ravnaqi, aholi farovonligiga o‘z hissasini qo‘shishi kerakligi haqidagi g‘oya ilgari surilgan. Zero, filmdan ko‘zlangan asosiy maqsad ham barkamol avlod ta’lim-tarbiyasi, ma’naviy-ma’rifiy sohalarda amalga oshirilayotgan islohotlarning mazmun-mohiyatini yoshlarga tushuntirish, ularni ona Vatanga muhabbat, istiqlol g‘oyalariga sadoqat ruhida kamol toptirishdir.
Film ssenariyi muallifi va postanovkachi rejissyori – Nilufar Ibrohimxo‘jayeva, postanovkachi operator – Dilmurod Turdiboyev, postanovkachi rassom – Bahriddin Shamsiddinov, adabiy maslahatchi – Nigora Nazarova, badiiy rahbar – Ayub Shahobiddinov. Asosiy rollarni O‘zbekiston xalq artisti Muhammadsoli Yusupov, O‘zbekistonda xizmat ko‘rsatgan artist Farhod Abdullayev, aktyorlar Tolib Hojiyev, Akbarxo‘ja Rasulov va boshqalar ijro etgan.
Izoh (0)