2014 йил 21 октябрь куни соат 4:04 да Тошкент шаҳар Олмазор тумани Байроқтол кўчасидаги 15-уйда жойлашган МTEGRA МЧЖга қарашли бинода ёнғин содир бўлди, дея хабар бермоқда Ўзбекистон ички ишлар вазирлиги матбуот хизмати.
Ёнғин ўз вақтида етиб келган ўт ўчирувчилар томонидан тезда ўчирилди. Қурбонлар ва жароҳатланганлар йўқ.
Хабарда қайд этилишича, бахтсиз ҳодисага қисқа туташув сабаб бўлган.
Ёнғин натижасида мазкур бинода ижарада фаолият кўрсатаётган ASKLEPIY, GESTIYA BUSINESS, AMIK PHARM, NEVILLE SERVIS, PHARM ABIDI INT ва NIKA FARM корхоналари бинолари ва ичида дори-дармон маҳсулотлари бўлган жами 5000 метр² майдон зарар кўрган.
Айни пайтда ёнғин оқибатида етказилган зарар миқдори аниқланмоқда.
Эслатиб ўтамиз, аввалроқ ижтимоий тармоқ фойдаланувчилари ёнғин ҳақида хабар берган эди.
Изоҳ (0)