Август ойида Россияда истиқомат қилиш учун гувоҳномага эга бўлган АҚШ махсус хизматлари собиқ ходими Эдвард Сноуден Москвага ўз севган қизи — раққоса Линдси Миллсни кўчириб келди. Бу ҳақда 10 октябрь куни Нью-Йорк кинофестивалида премьера сифатида намойиш этилган Citizenfour ҳужжатли фильмига асосланиб, The Guardian хабар бермоқда.
Фильм муаллифи маълумотларига кўра, Миллс Москвага жорий йилнинг июлида келган. Икки соатли картинада Сноуден ва Миллснинг Россиядаги биргаликдаги ҳаёти акс этган кадрлар мавжуд.
Эдвард Сноуден билан боғлиқ можаро 2013 йил июнида келиб чиққан эди. Ўшанда у АҚШ махсус хизматлари интернет ва мобил алоқа орқали бутун дунёдаги фойдаланувчиларни кузатиб боргани ҳақидаги махфий ахборотларни фош этган эди.
2013 йилнинг 1 август куни Россия ҳукумати АҚШ махсус хизматларининг собиқ ходимига бир йиллик муддатга вақтинчалик бошпана беришга қарор қилган эди. 2014 йил 7 август куни эса Эдвард Сноуден уч йил муддатга Россия Федерациясида истиқомат учун гувоҳномага эга бўлди.
Изоҳ (0)