КХДР етакчиси Ким Чен Ин 40 кун ичида биринчи марта омма олдида пайдо бўлди, дея хабар бермоқда ТАСС «ЦТАК»ка таяниб. У олимлар учун қурилган янги турар жой мажмуасига ташриф буюрди.
«У ранг-баранг керамик плита билан безатилган турар жой ва жамоат бинолари фасадларини кўздан кечираётганида мамнун кўринди», — деб ёзади «ЦТАК».
КХДРда Ким Чен Иннинг янги фотосуратлари ҳам тарқатилган. Расмларда унинг қора ҳассага таяниб юрганини кўриш мумкин. Бироқ фотосуратлар қайси санада олинганига аниқлик киритилмаган.
Аввалроқ Ким Чен Ин август охири — сентябрь бошида ўтказилган ҳарбий машғулотлар чоғида жароҳат олгани, соғлиғи қайта тикланиши учун 100 кунча талаб этилиши хабар берилган эди.
Эслатиб ўтамиз, 10 октябрь куни Шимолий Корея етакчиси Ким Чен Ин Корея Меҳнат партияси ташкил этилганининг 69 йиллиги муносабати билан бўлиб ўтган байрам тадбирларида қатнашмади.
Аввалроқ Ким Чен Ин сентябрь ойида оғир операцияни бошидан кечиргани ҳақида хабар берилган эди.
25 сентябрь куни 3 ҳафтадан буён оммага кўринмаган Ким Чен Ин КХДР олий халқ кенгашининг навбатдаги сессиясида қатнашмагани хабар қилинган эди. Шу куни КХДР телевидениесида Ким Чен Иннинг оқсоқланаётгани кўрсатилган бўлиб, етакчининг соғлиғи жойида эмаслиги ҳам айтилган.
Изоҳ (0)