АҚШлик икки қаватли уйини iPhone 6’га айирбошлаши ҳақида эълон берди

Американинг Детройт шаҳрида (Мичиган штати) бир киши риэлторлик агентлиги сайтига икки қаватли уй сотилиши ёки iPhone 6’га айирбошланиши ҳақида эълон жойлаштирди. Бу ҳақда Fох-2 телеканалига таяниб, ТАСС хабар берди.

Маълум бўлишича, ғиштли уй июнь ойида сотувга қўйилган, бироқ тўғри келадиган харидор топилмагач, сотувчи уйни янги iPhone 6 смартфони ёки iPad планшетига айирбошлашга тайёрлигини эълон қилган.

Кўчмас мулк бўйича агент Ларри Эльсон эълоннинг ҳақиқийлигини тасдиқлади.

Таъкидлаш жоиз, 40 йил аввал Америка автосаноатидаги вазият ёмонлашиши билан, Детройтдаги аҳвол ҳам оғирлаша бошлади. Бундан 10 йил олдин шаҳарда 1,8 миллион киши яшаган бўлса, бугунги кунга келиб ушбу кўрсаткич атиги 700 мингтага тушиб қолди. Натижада шаҳар ғазнасига солиқ тушумлари камайиб кетди, инфратузилма бузила бошлади, жиноятчилик даражаси ошди.

Детройт аллақачон АҚШнинг жиноий пойтахтига айланиб бўлди — бу ердаги жиноятчилик даражаси мамлакатдаги ўртача кўрсаткичдан беш баробар юқоридир.

2013 йил охирида шаҳар банкрот деб эълон қилинди, унинг қарзи 18 миллиард долларга тенг.