Украина ҳарбий ҳужумни режалаштирмаяпти. Бу ҳақда Украина ташқи ишлар вазири Павел Климкин Германиянинг Die Zeit газетасига берган интервьюсида маълум қилди, деб ёзади Segodnya.ua.
«Бизга биринчи навбатда мамлакатдаги ички низо учун сиёсий ечим, шунингдек ушбу низога алоқадор бўлган Россия билан шунга ўхшаш сиёсий ечим зарур», — дея таъкидлади у.
Вазир сўзларига кўра, мамлакат шарқида Луганск ва Донецк билан вақтинчалик сулҳ тузиш муаммонинг ечими бўлиб хизмат қилиши мумкин: улар алоҳида иқтисодий мақомга эга бўлиши, бироқ Украинанинг бир қисми бўлиб қолиши мумкин. «Россия намунасидаги федерализацияни номақбул деб ҳисоблаймиз», — деди у.
Шу билан бирга, Украина ташқи сиёсий идораси раҳбари Украина НАТО билан ҳамкорлик қилаётгани, бироқ ҳужум бўйича ҳеч қандай режалари йўқлигини айтиб ўтди.
Бундан ташқари, вазир Европа давлатлари билан қурол-яроғ етказиб бериш ҳақидаги баъзи музокаралар муваффақиятли ўтганини тан олди. «Бироқ бунда гап ҳужумкор эмас, мудофаа қуроллари ҳақида бормоқда. Улар бизга жуда зарур, — деди Климкин. — Масалан, НАТОнинг сўнгги саммити олдидан Германия билан ўтказилган музокаралар ҳақиқий омад келтирди. Германия бизга қурол-яроғ етказиб беришга рози бўлди».
Изоҳ (0)