АҚШ Фуқаро авиацияси федерал бошқармаси учувчисиз самолётларнинг тижорат компаниялари томонидан фойдаланилишига бўлган чекловни камайтирди ва илк маротаба Голливуднинг 6 та телевидение ва кино компанияларига аҳоли яшаш ҳудудларида кичик учиш аппаратларидан фойдаланишга рухсат берди. Бу ҳақда Reuters’га таяниб Korrespondent.net хабар бермоқда.
«Бугунги қарор учувчисиз самолётлардан тижорат мақсадларида фойдаланиш учун муҳим қадамдир. Шу билан бирга, биз барча турдаги парвозларнинг хавфсизлигини таъминлаш бўйича жаҳон стандартларини сақлаб қоламиз», − деди АҚШ транспорт вазири Энтони Фокс.
ABC News телеканалининг хабарига кўра, учувчисиз аппаратлардан фойдаланиш учун компаниялар бир неча шартларга риоя қилишлари лозим. Масалан, парвоз аппарати доимо кўринарли ҳудудда жойлашиши керак ва суратга олишда қатнашмаётган одамларга 300 метрдан кам масофага яқинлашмаслиги шарт. Шартномага биноан, учувчисиз аппарат тезликни соатига 90 километрдан оширмаслиги ва 120 метрдан баландга кўтарилмаслиги керак.
Изоҳ (0)