AQSh Fuqaro aviatsiyasi federal boshqarmasi uchuvchisiz samolyotlarning tijorat kompaniyalari tomonidan foydalanilishiga bo‘lgan cheklovni kamaytirdi va ilk marotaba Gollivudning 6 ta televideniye va kino kompaniyalariga aholi yashash hududlarida kichik uchish apparatlaridan foydalanishga ruxsat berdi. Bu haqda Reuters’ga tayanib Korrespondent.net xabar bermoqda.

“Bugungi qaror uchuvchisiz samolyotlardan tijorat maqsadlarida foydalanish uchun muhim qadamdir. Shu bilan birga, biz barcha turdagi parvozlarning xavfsizligini ta’minlash bo‘yicha jahon standartlarini saqlab qolamiz”, − dedi AQSh transport vaziri Entoni Foks.

ABC News telekanalining xabariga ko‘ra, uchuvchisiz apparatlardan foydalanish uchun kompaniyalar bir necha shartlarga rioya qilishlari lozim. Masalan, parvoz apparati doimo ko‘rinarli hududda joylashishi kerak va suratga olishda qatnashmayotgan odamlarga 300 metrdan kam masofaga yaqinlashmasligi shart. Shartnomaga binoan, uchuvchisiz apparat tezlikni soatiga 90 kilometrdan oshirmasligi va 120 metrdan balandga ko‘tarilmasligi kerak.