Ўзбекистон кенг полосали стационар интернетни жорий қилиш бўйича 190 мамлакат ичида 128-ўринни эгаллади, дея хабар бермоқда UzDaily БМТ маърузасига таяниб.
Ушбу ҳисобот 2014 йил 21 сентябрь куни Нью-Йорк шаҳрида БМТнинг рақамли тараққиёт учун кенг полосали алоқа бўйича Комиссияси томонидан тақдим этилди.
Нашрнинг таъкидлашича, 2012 йил якунлари бўйича Ўзбекистон бу борада 183 давлат ичида 131-ўринни банд қилган эди.
Ҳужжатга кўра, 2013 йил якунлари бўйича Ўзбекистонда кенг полосали стационар интернетнинг кириб бориши ҳар 100 кишига 1,1 абонентни ташкил қилади. 2012 йилда эса ушбу кўрсаткич 100 кишига 0,7 абонентдан иборат бўлган.
Шунингдек, тадқиқот натижалари 2013 йилда Ўзбекистонда интернетга уланиш имкони бўлган жисмоний шахслар улуши 38,2 фоизга тенглигини кўрсатди. Ушбу кўрсаткич бўйича Ўзбекистон дунёнинг 191 мамлакати ичида 100-ўринни, 144 та ривожланаётган давлатлар ичида эса 53-ўринни эгаллади.
Изоҳ (0)