«Система» акциядорлик молиявий корпорацияси раҳбари Владимир Евтушенковнинг ҳибсга олиниши Ўзбекистонда Universal Mobile Systems қўшма корхонаси ташкил этилишига таъсир кўрсатмайди. Бу ҳақда «Анҳор» нашри хабар берди.
Маълум бўлишича, нашр МТСни назорат қилувчи «Система» АМК билан боғланганида «АМК раҳбари билан юз берган сўнгги воқеалар Ўзбекистонда ҚК тузиш режаларига ҳеч қандай ўзгартириш киритмаслиги керак»лигини таъкидлашган.
Эслатиб ўтамиз, «Система» АМКнинг асосий хўжайини Владимир Евтушенковга нисбатан айблов эълон қилинди. У пул маблағларини «ювиш»да айбланиб, ҳозирда уй қамоғида сақланмоқда.
Евтушенковнинг айби тасдиқланса, у етти йилга қамалади ва 1 миллион рублгача жарима тўлайди. «Система» АМК бу айбловларни тамоман асоссиз деб ҳисобламоқда.
«Система» акциядорлик молиявий корпорацияси очиқ акциядорлик жамияти — Россия молиявий саноат гуруҳи бўлиб, у МТС мобил оператори акцияларининг назорат пакетига эгалик қилади. «Система» директорлар кенгаши раиси Владимир Евтушенков Россиянинг энг бой бизнесменлари 20 талигига киради. Маҳаллий Forbes нашри унинг давлатини 9 миллиард долларга баҳолаган.
Аввалроқ МТС компанияси Ўзбекистон ҳукумати билан муроса битими имзолагани, Ўзбекистонда янги қўшма корхона — Universal Mobile Systems ташкил этиши, корхонанинг 50,01 фоизи МТСга, 49,99 фоизи эса Ўзбекистон ҳукуматига тегишли бўлиши ҳақида хабар берилган эди.
UMS’ни рўйхатга олиш ишлари 25 сентябрга қадар тугалланиши кутилаётгани маълум қилинган эди. Бундан ташқари, қўшма корхонанинг 1 ноябрга қадар техник, 1 декабргача эса тижорий эксплуатацияни амалга ошириши режалаштирилган.
Изоҳ (0)