“Sistema” aksiyadorlik moliyaviy korporatsiyasi rahbari Vladimir Yevtushenkovning hibsga olinishi O‘zbekistonda Universal Mobile Systems qo‘shma korxonasi tashkil etilishiga ta’sir ko‘rsatmaydi. Bu haqda “Anhor” nashri xabar berdi.
Ma’lum bo‘lishicha, nashr MTSni nazorat qiluvchi “Sistema” AMK bilan bog‘langanida “AMK rahbari bilan yuz bergan so‘nggi voqealar O‘zbekistonda QK tuzish rejalariga hech qanday o‘zgartirish kiritmasligi kerak”ligini ta’kidlashgan.
Eslatib o‘tamiz, “Sistema” AMKning asosiy xo‘jayini Vladimir Yevtushenkovga nisbatan ayblov e’lon qilindi. U pul mablag‘larini “yuvish”da ayblanib, hozirda uy qamog‘ida saqlanmoqda.
Yevtushenkovning aybi tasdiqlansa, u yetti yilga qamaladi va 1 million rublgacha jarima to‘laydi. “Sistema” AMK bu ayblovlarni tamoman asossiz deb hisoblamoqda.
“Sistema” aksiyadorlik moliyaviy korporatsiyasi ochiq aksiyadorlik jamiyati — Rossiya moliyaviy sanoat guruhi bo‘lib, u MTS mobil operatori aksiyalarining nazorat paketiga egalik qiladi. “Sistema” direktorlar kengashi raisi Vladimir Yevtushenkov Rossiyaning eng boy biznesmenlari 20 taligiga kiradi. Mahalliy Forbes nashri uning davlatini 9 milliard dollarga baholagan.
Avvalroq MTS kompaniyasi O‘zbekiston hukumati bilan murosa bitimi imzolagani, O‘zbekistonda yangi qo‘shma korxona — Universal Mobile Systems tashkil etishi, korxonaning 50,01 foizi MTSga, 49,99 foizi esa O‘zbekiston hukumatiga tegishli bo‘lishi haqida xabar berilgan edi.
UMS’ni ro‘yxatga olish ishlari 25-sentabrga qadar tugallanishi kutilayotgani ma’lum qilingan edi. Bundan tashqari, qo‘shma korxonaning 1-noyabrga qadar texnik, 1-dekabrgacha esa tijoriy ekspluatatsiyani amalga oshirishi rejalashtirilgan.
Izoh (0)