Ўзбекистонда ОИВ инфекцияси тарқалишига қарши курашиш бўйича Давлат дастури қабул қилинди

Ўзбекистонда 2014—2016 йилларда ОИВ инфекцияси тарқалишига қарши курашиш соҳасидаги Давлат дастури (pdf) тасдиқланди.

Давлат дастури Ўзбекистон Республикаси Вазирлар Маҳкамасининг 2014 йил 10 сентябрдаги қарори билан тасдиқланди.

Дастур «Одамнинг иммунитет танқислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида»ги Ўзбекистон Республикаси қонунини бажариш юзасидан қабул қилинди.

Дастур доирасида Ўзбекистон 21 та лойиҳани амалга оширмоқчи. Хусусан, ОИВ инфекцияси тарқалишига қарши курашиш бўйича профилактика тадбирлари амалга оширилади, ОИТС билан курашиш марказлари ва даволаш-профилактика муассасаларининг моддий-техник базаси мустаҳкамланади, ОИВ инфекцияси масалалари бўйича мутахассисларни мунтазам ва тизимли равишда тайёрлаш ҳамда уларнинг малакасини ошириш ташкил этилади.

Тадбирларни амалга ошириш учун жами 12 255 миллион сўм ва 14 125,4 минг АҚШ доллари сарфланади. Шундан 12 036 миллион сўм бюджет маблағлари, 219 миллион сўм бажарувчилар маблағлари ва 14 125,4 минг доллар халқаро ташкилотлар, молия институтлари маблағлари ва грантлар орқали қопланади.