Ўзбекистонда «Тижорат сири тўғрисида»ги қонун кучга кирди

13 сентябрь куни Ўзбекистонда «Тижорат сири тўғрисида»ги қонун кучга кирди, дея хабар бермоқда Gazeta.uz.

Аввалроқ 11 сентябрда ҳужжат Ўзбекистон Президенти Ислом Каримов томонидан имзоланган, 12 сентябрда эса «Народное слово» ва «Халқ сўзи» газеталарида чоп этилган эди.

Қонун 18 июнда Олий Мажлиснинг Қонунчилик палатаси томонидан қабул қилинган ва 28 августда Сенат томонидан маъқулланган.

Қонунга мувофиқ, тижорат сири – илмий-техника, технология, ишлаб чиқариш, молиявий-иқтисодий ва бошқа соҳаларда учинчи шахсларга маълум бўлмаганлиги сабабли тижорат қадрига эга бўлган, эркин фойдаланиш ҳуқуқи мавжуд бўлмаган, қонун асосида фойдаланиладиган ва мулкдор унинг махфийлигини ҳимоя қилиш бўйича чоралар кўрадиган ахборотдир.

«Тижорат сирининг мулкдори – тижорат сирига эгалик қилиш, ундан фойдаланиш ва уни тасарруф этишни амалга оширувчи ва унга нисбатан тижорат сири режимини ўрнатган юридик ёки жисмоний шахс. Мулкдордан шартнома асосида тижорат сирини эгалик қилиш ва фойдаланишга олган юридик ёки жисмоний шахс конфидент ҳисобланади», — дейилади ҳужжатда.

Қонунда шунингдек махфийлик ва тижорат сири режими, эркин фойдаланиш ҳуқуқи, тижорат сиридан фойдаланишга рухсат ва уни ошкор қилиш тушунчаларига ҳам аниқ таърифлар берилган.