Ўзбекистон От спорти федерацияси раисининг биринчи ўринбосари Рафқат Миғмонов Тошкентдаги матбуот анжуманида пойтахтдаги ипподром реконструкциясининг қачон якунланишини маълум қилди, дея хабар бермоқда 12news.uz.
Унинг айтишича, айни пайтда от спорти мусобақалари аренасини реконструкция қилиш ишлари олиб борилмоқда.
«Ипподром акциялари Фонд биржасида хорижий компаниялар учун ҳам савдога қўйилган эди. Унинг очилиш маросими кейинги йилдаги Наврўз байрамига тўғри келиши мумкин», — дея таъкидлади Миғмонов.
Аввалроқ 1971 йилда қурилган ипподромни модернизация қилиш ишлари франциялик мутахассислар ҳамкорлигида замонавий халқаро стандартларни ҳисобга олган ҳолда олиб борилаётгани хабар берилган эди.
Мажмуада турли спорт тадбирлари ўтказилишидан ташқари, от минишга ўргатиш мактаби ҳам фаолият олиб боради.
2010 йилдаги ҳукумат қарорига кўра, «Марказий Ипподром» ОАЖнинг 90 фоизи Ўзбекистон Хусусийлаштириш, монополиядан чиқариш ва рақобатни ривожлантириш давлат қўмитасига, 10 фоизи ОАЖнинг ўзига тегишлидир.
Изоҳ (0)