Ўзбекистонда энди Duet карталари ҳам Click тизимига уланиши мумкин бўлди

Click компанияси Duet (offline) ва Visa (сўмлик) пластик карталарнинг тизимга уланиш имконияти ишга туширилиши ҳақида хабар қилмоқда.

Энди Ўзбекистон Республикасида мавжуд бўлган банклар томонидан чиқарилган барча турдаги пластик карталарнинг эгаларига Click тизимидан фойдаланишга имкон очилмоқда. Ҳозирги пайтда республикада 12,4 миллиондан ортиқ пластик карталар айланмага чиқарилган бўлиб, шулардан 7 миллиондан ортиғи Дuet карталаридир, Visa пластик карталарнинг сони эса 700 мингдан зиёд.

«Бугун биз Duet офлайн карталарни тизимга улаш имкониятини ишга туширдик ва шу билан бир вақтда янги платформага банкларни улаш ишларини фаол олиб бормоқдамиз. Visa пластик карталари бўйича ҳам шундай имкониятни жорий қилиш ишлари олиб борилаяпти», — деб таъкидлади Click компанияси директори Улуғбек Рустамов.

Хабар берилишича, сўнгги йил давомида компания ўз фойдаланувчилари сонини 100 мартага оширди: ўтган йилнинг сентябри бошида уларнинг сони 4000 атрофида бўлган бўлса, ҳозирги пайтга келиб эса уларнинг сони 400 000 га яқинлашиб қолди.