АҚШ Конгресси вакиллар палатаси мамлакат президентини жавобгарликка тортиш бўйича суд жараёни учун 350 минг долларгача тўлайди. Бу ҳақда Америка ОАВлари қўлига тушган шартнома гувоҳлик бермоқда, деб ёзади ИТАР-ТАСС.
Ҳужжат вакиллар палатасининг маъмурий масалалар бўйича қўмитаси раиси Кендис Миллер ва Вашингтондаги BakerHostetler юридик маҳкамаси томонидан имзоланган. Унинг шериги Дэвид Ривкин судда қонун чиқарувчилар манфаатларини ҳимоя қилади.
Шартноманинг амал қилиш муддати 2015 йил 3 январь куни тугайди. Унинг шартларига кўра, ҳуқуқшунослар ўз хизматлари учун соатига 500 доллар олади. Таҳлилчиларнинг эслатишича, АҚШдаги энг кам иш ҳақи бундан деярли 50 марта камдир.
«АҚШ президенти конституциядан устун бўла олмайди, унинг доирасидан чиқа олмайди ҳам», — деди Миллер.
Демократлар шартнома тузилганлиги ҳақидаги янгиликни истеҳзо билан қабул қилди. «Ниҳоят республикачилар имзолаган шартнома импичмент учун пойдевор яратади, уни партиянинг энг радикал кайфиятдаги аъзолари қўллаб-қувватлайди», — дея ушбу воқеани изоҳлади палатадаги Демократик озчилик етакчиси Нэнси Пелоси.
Июль охирида вакиллар палатаси республикачилар шарофати билан АҚШ президенти Барак Обамани соғлиқни сақлаш ислоҳотларини ўтказиш чоғида ўз мансабини суиистеъмол қилгани учун жавобгарликка тортиш ҳақида резолюция қабул қилган эди.
Изоҳ (0)