AQSh Kongressi vakillar palatasi mamlakat prezidentini javobgarlikka tortish bo‘yicha sud jarayoni uchun 350 ming dollargacha to‘laydi. Bu haqda Amerika OAVlari qo‘liga tushgan shartnoma guvohlik bermoqda, deb yozadi “ITAR-TASS”.
Hujjat vakillar palatasining ma’muriy masalalar bo‘yicha qo‘mitasi raisi Kendis Miller va Vashingtondagi BakerHostetler yuridik mahkamasi tomonidan imzolangan. Uning sherigi Devid Rivkin sudda qonun chiqaruvchilar manfaatlarini himoya qiladi.
Shartnomaning amal qilish muddati 2015-yil 3-yanvar kuni tugaydi. Uning shartlariga ko‘ra, huquqshunoslar o‘z xizmatlari uchun soatiga 500 dollar oladi. Tahlilchilarning eslatishicha, AQShdagi eng kam ish haqi bundan deyarli 50 marta kamdir.
“AQSh prezidenti konstitutsiyadan ustun bo‘la olmaydi, uning doirasidan chiqa olmaydi ham”, — dedi Miller.
Demokratlar shartnoma tuzilganligi haqidagi yangilikni istehzo bilan qabul qildi. “Nihoyat respublikachilar imzolagan shartnoma impichment uchun poydevor yaratadi, uni partiyaning eng radikal kayfiyatdagi a’zolari qo‘llab-quvvatlaydi”, — deya ushbu voqeani izohladi palatadagi Demokratik ozchilik yetakchisi Nensi Pelosi.
Iyul oxirida vakillar palatasi respublikachilar sharofati bilan AQSh prezidenti Barak Obamani sog‘liqni saqlash islohotlarini o‘tkazish chog‘ida o‘z mansabini suiiste’mol qilgani uchun javobgarlikka tortish haqida rezolyutsiya qabul qilgan edi.
Izoh (0)