Россияга олиб кирилиши тақиқланган маҳсулотлар рўйхатига тирик балиқ ҳам киритилди. Бу ҳақда Россия бош вазири Дмитрий Медведев томонидан имзоланган ва вазирлар маҳкамаси сайтига жойланган ҳукумат қарорида айтилади. Шу билан бирга, рўйхатдан лосось ва форель балиқчалари, лактозасиз сут ва сут маҳсулотлари, уруғлик картошкаси, шакарли маккажўхори, нўхат, биологик фаол қўшимчалар ва витаминлар чиқариб ташланди.
15 август куни соғлиқни сақлаш вазирлиги ҳукуматга дори сифатида рўйхатдан ўтказилган витаминлар рўйхатини юборди. Унда соғлиқни сақлаш вазирлиги дори-дармон билан таъминлаш ва тиббий маҳсулотлардан фойдаланишни тартибга солиш департаменти директори Елена Максимкинага таяниб, ушбу витаминларни келтириш тақиқланган маҳсулотлар рўйхатидан олиб ташлаш таклиф қилинган эди. У рўйхатга, асосан биологик фаол қўшимчалар ва ихтисослашган озиқ-овқатлар, жумладан диабет билан оғриган шахслар учун, тушганини таъкидлаган.
7 август куни бир қатор мамлакатлар Украинадаги воқеалар туфайли Россияга жорий қилган санкцияларга жавобан, Москва Евроиттифоқ мамлакатлари, Австралия, Канада, Норвегия ва АҚШдан мол гўшти, чўчқа гўшти, сабзавот ва мевалар, қуш гўшти, балиқ, пишлоқ, сут ва сут маҳсулотлари олиб келишни тўлиқ тақиқлаган эди. Чекловлар бир йил муддатга киритилади. Эмбарго болалар озуқасига тегишли бўлмайди.
Изоҳ (0)