15 август, жума куни Грузия собиқ президенти Михаил Саакашвилига нисбатан расман давлат ичидаги қидирув эълон қилинди, дея хабар берди «Российская газета».
Саакашвилининг қаердалиги ҳозирча номаълум. У ўтган йилнинг ноябрида бўлиб ўтган янги президент инаугурациясидан кейин шошилинч тартибда Грузияни тарк этган, шундан буён унга қарши учта жиноят иши очилгани сабабли, Саакашвили ватанига қайтишдан ҳайиқмоқда.
Саакашвили Грузияга қайтиб келадиган бўлса, у зудлик билан ҳибсга олиниб, бутун тергов давомида қамоқда сақланади. Агар унинг айби исботланса, қамоқда 10—15 йилни ўтказади.
Саакашвили халқаро қидирувга берилмаган, шу сабабли у чет элда бемалол ўз пулларини сарфлаб юравериши мумкин, дейилади хабарда.
Эслатиб ўтамиз, Грузия прокуратураси собиқ президентни давлатга тегишли 5 миллион доллар маблағни ноқонуний равишда сарфлаб юборганликда айбланмоқда. Бундан ташқари, у 2007 йил 7 ноябрь куни Тбилисида намойишга чиққан мухолифатни куч билан бостирганликда ва Грузия парламенти собиқ депутати Валерий Гелашвилини дўппослаганликда айбланмоқда.
Изоҳ (0)