Хитой жануби-ғарбидаги Юньнань провинциясида рўй берган ер силкинишида ҳалок бўлганлар сони 410 кишига етди. ИТАР-ТАССнинг провинция маъмуриятига таяниб хабар беришича, 12 киши бедарак йўқолган, 2373 киши жароҳатланган, яна 230 минг киши эвакуация қилинган.
Келиб тушган хабарларга кўра, 80 мингта уй бутунлай вайрон бўлган, яна 124 мингтасига жиддий зарар етган. Офатдан жами бир миллиондан зиёд аҳоли зарар кўрган.
Эслатиб ўтамиз, 6,5 магнитудали (баъзи манбаларда 6,1 магнитудали) зилзила маҳаллий вақт билан 3 август 16:30 да (Тошкент вақти билан 3 август 13:30 да) бўлиб ўтди. Зилзила ўчоғи Чжаотун шаҳридаги Лудянь уезди ҳудудида 12 километр чуқурликда жойлашди. Ушбу уездда 265 мингдан ортиқ киши яшайди. У ерда телефон алоқаси узилган, қатор бинолар бузилган, электр узатиш линиялари зарарланган. Хитой ОАВлари таъкидлашича, ушбу зилзила Юньнанда сўнгги 14 йил ичида юз берган энг кучлиси бўлди.
Изоҳ (0)