Германиялик ўспирин йўқолган iPhone’ини қидириш учун ҳовузни қуритди

Германияда 16 ёшли мактаб ўқувчиси бутун бошли ҳовузни қуритиб, у ерга тушиб кетган iPhone’ини олмоқчи бўлди, дея хабар берди Metro.

Кёльнлик исми ошкор қилинмаётган мактаб ўқувчиси дўстлари билан балиқ тутгани боради. У машғулотга берилиб кетганидан телефонини тасодифан сувга тушириб юборади. Йигитча қандай қилиб бўлса-да, ўз гаджетини олишга қарор қилади. Аввал у маҳаллий балиқ овлаш клубига мурожаат қилиб, ғаввослар кийими беришларини сўрайди. Улардан рад жавоби олгач, бола ҳозувни қуритишга бел боғлайди.

Топқир йигитча иккита резина ичак ва насос олиб, улар ёрдамида ҳовуздаги сувни яқин атрофда жойлашган жамоат ҳожатхонасига ҳайдай бошлайди. Бироқ канализация тизимига уланмагани учун ҳожатхонадан сув тошиб кетади.

Эртаси куни ҳожатхона жойлашган манзилгоҳ хўжайини ўз муассасасининг катта кўлмакка айланиб қолганини кўради ва полицияга мурожаат қилади. Тошқин содир этган ўспиринни тутиб келтиришади ҳамда ҳожатхонага зарар етказгани, тўхташ жойини ифлослантиргани ва ҳовуздан сувни ҳайдагани учун жаримага тортилади. Сувни яна ҳовузга қайтаришади.

Шунча оворагарчиликларга қарамай, йигит телефонини топа олмади. Бироқ у умидсизликка тушмади. «Топилишига сал қолди-ку!» — деди у.