Шимолий Афғонистондаги Хулм шаҳридан 22 километр шимоли-ғарбда 13 июль, якшанба куни Тошкент вақти билан 21:23 да 5 магнитудали зилзила рўй берди. Бу ҳақда АҚШ Геология хизмати хабар бермоқда, деб ёзади «Кун».
Зилзила Ўзбекистоннинг Афғонистон билан чегарадош Сурхондарё вилояти маъмурий маркази — Термиз шаҳрида ҳам сезилган. «Тошкент» сейсмостанциясидан «Кун»га маълум қилишларича, Термиздаги зилзила кучи Рихтер шкаласи бўйича 3 баллга тенг бўлган.
Ушбу зилзила кучи Ўзбекистон пойтахти Тошкент шаҳрида деярли сезилмаган.
Зилзила натижасида рўй берган вайронагарчиликлар ва жабрланувчилар тўғрисида маълумот йўқ. Қайд этиш жоиз, Афғонистоннинг шимолий қисми сейсмик фаол ҳудудлардан бири ҳисобланади.
Изоҳ (0)