Қамчиқ довонидан темирйўл туннелини қуриш бўйича 455 миллион долларлик шартнома Ўзбекистон-Хитой иқтисодий ҳамкорлиги доирасидаги энг йирик лойиҳага айланди.
Бу ҳақда China Railway Tunnel Group компанияси раҳбари ўринбосари, «Ангрен – Поп» темирйўл линияси лойиҳаси бошлиғи Чжоу Сяогуан Хитойнинг «Женмин Жибао» газетасига берган интервьюсида маълум қилди, деб ёзади «Кун».
«Бу илк мустақил хорижий йирик лойиҳа, бундан ташқари, бу Хитой томонидан Марказий Осиёда қурилаётган энг узун темирйўл туннелидир», – деди Чжоу Сяогуан.
Унинг сўзларига кўра, лойиҳа 2013 йил сентябрида старт олган бўлиб, уч йил муддатга мўлжалланган ва 2016 йил 1 август куни фойдаланишга топширилиши керак.
Қўшимча сифатида, «Синьхуа» ахборот агентлиги томонидан Қамчиқ довонида хитойлик мутахассислар томонидан қазилаётган туннелнинг илк суратларини намойиш этилди.
Маълумот учун, узунлиги 125 километр бўлган «Ангрен – Поп» темирйўлининг қурилиши якунига етиши билан Ўзбекистоннинг тўлақонли ички, қўшни мамлакатларга боғлиқ бўлмаган темирйўл тизими ишга тушиб, Ўзбекистоннинг Фарғона водийсидаги уч вилояти мамлакатнинг қолган қисми билан темирйўл билан боғланади.
Изоҳ (0)