Кеча, 8 июль куни Тошкентдаги «Эверия» қаҳвахонаси яқинида йўлнинг икки томонида тўхтаб турган иккита Spark қуриган дарахт шохи остида қолди. Бу ҳақда Facebook’даги «Водители Ташкента» («Тошкент ҳайдовчилари») гуруҳи аъзолари хабар берди.
Хабарга илова қилинган суратда улкан дарахтнинг каттагина шохи қуриб қолганини кўриш мумкин. Унинг узунлиги кўчанинг икки юзидаги машиналарни босиб қолиш учун етарли бўлди. Қизиғи шундаки, ҳар иккала автомобиль ҳам Spark русумида.
Постга билдирилган фикрларда фойдаланувчилар машина эгаларига ҳамдардлик изҳор этган ва суғурта компаниялари етказилган зарарни қоплаш-қопламаслиги устида баҳс олиб борилган. Гуруҳ аъзоларидан баъзилари бу суғурта компанияларининг мажбурияти эканини таъкидлаган бўлса, бошқалар зарарни қоплаш учун компания аввал вазиятни баҳолашини таъкидлаган. «Суғурта компанияси мутахассислари зарарни қопламаслик қарорини чиқариши мумкин, — деди фойдаланувчилардан бири. — Чунки атрофда тайёр «парковка» бўлса-да, ҳайдовчи қуриган дарахт тагидаги жойни танлаган».
Изоҳ (0)