Аргентина Бельгияни мағлуб этиб, ярим финалга йўл олди

ЖЧ-2014 чорак финалидан ўрин олган Аргентина — Бельгия учрашуви ўз ниҳоясига етди. Муросасиз кечган баҳсда Европа қитъаси вакиллари мағлубиятга учради. Бу ҳақда UFF.uz хабар берди.

Учрашувнинг 8-дақиқасидаёқ аргентиналиклар ҳисобни очишди. Игуаин Компанининг қайтарган тўпини эгаллаб олди ва тўпга ҳавода зарба йўллади, 1:0.

Мазкур голдан сўнг аргентиналиклар ўйинни чўзиш ва белгияликларнинг шаштини тушириш билан банд бўлишди. Ди Мариянинг жароҳат олиб майдонни тарк этгани биринчи бўлимдаги энг муҳим воқеалардан бири бўлди.

Иккинчи бўлимда Бельгия керакли ўзгартиришлар қилганига қарамасдан, жамоа рақиб жарима майдонига тўпни қанотдан ташлашдан бошқа нарсани уддалай олмади.

Шу тариқа Аргентина кичик ҳисобда Бельгияни мағлуб этди ва ЖЧ-2014 ярим финалига йўл олди. Уларга Голландия ҳамда Коста-Рика баҳси ғолиби финал учун курашда рақиблик қилади.