Эрматовнинг Мексика—Хорватия матчидаги ҳакамлиги 8,5 балл билан юқори баҳоланди

Ўзбекистонлик ФИФА рефериси Равшан Эрматов ЖЧ — 2014 давомидаги иккинчи ҳакамлиги учун 8,5 балл тўплади.

Эрматов 24 июнь куни бўлиб ўтган Мексика — Хорватия ўйинида ҳакамлик қилди. Унда Мексика Хорватия устидан 3:1 ҳисобида ғалаба қозонди.

ЖЧ — 2014’даги ҳакамликлари учун умумий 7,8 балл билан Worldreferee.com сайтида Эрматов учинчи ўринни эгаллади. Бироқ ундан юқоридаги арбитрлар — голландиялик Бёрн Кёйперс ва туркиялик Жунейт Чакирнинг ҳар иккиси ҳам у билан тенг — 7,8 очкодан йиққан.

Аввалроқ, Швейцария ва Эквадор терма жамоалари ўртасидаги ўйинни бошқарганидан сўнг ҳамюртимиз 7,6 балл тўплаган, бир неча кун ичида унинг очкоси 8,1 гача кўтарилган ва у ҳакамлар ичида мутлақ етакчига айланган эди.

Таъкидлаш жоиз, Worldreferee.com сайти футбол ўйинларидаги арбитрларнинг фаолиятларини баҳолаш билан шуғулланади. Уларга сайт мухбирлари ва аъзолари балл қўяди.