Тошкент ахборот технологиялари университетининг тўртинчи босқич талабаси Жамшид Саидов «киборг қўл» лойиҳасини яратди, деб ёзади «Туркистон-пресс» ахборот агентлиги.
Диплом иши сифатида тайёрлаган бу ихтиросини у «Камолот» ЁИҲ томонидан ташкил этилган «Замонамиз қаҳрамонлари» мавзусидаги давра суҳбатида илк бор кенг жамоатчиликка ҳавола этди.
Ушбу «киборг қўл» инсон қўлидан асло фарқ қилмайди. Ҳаракатланувчи механизми темир мурватлардан иборат бўлса-да, биологик хомашёдан тайёрланган суяклар, тўқималар ва тери билан қопланган. Бу механизм махсус дастур ёрдамида бошқарилади.
— Ҳар бир лойиҳани яратишимга ҳаётда кўрган-кечирган воқеаларим, кузатишларим сабаб бўлади, — дейди Жамшид Саидов. — Мен туғма ногирон ёки қўл-оёғи ампутация қилинган юртдошларимни кўрганда, инсон танасидаги аъзо ўрнини босадиган, уларнинг ҳаётга мослашувига ёрдам берадиган «киборг қўл» ёки оёқ яратишни ният қилгандим. Мана, бу йил шу орзуимга эришдим ва диплом иши сифатида бу лойиҳани ишлаб чиқдим. Тўғри, ампутантларга ўрнатиладиган протез қўл ва оёқлар анча олдин ўйлаб топилган. Аммо уларнинг бармоқлари ҳаракат қилиш имкониятига эга эмас. Менинг лойиҳам асосида ишланган «киборг қўл»нинг эса бармоқлари бемалол ҳаракат қилади ва улар ёрдамида маълум буюмларни, предметларни ушлаш ҳам мумкин.
Ёш ихтирочи шу кунгача чегара ҳудудларидан олиб ўтилаётган юклар хавфсизлигини текширувчи «робот-сапёр», чақалоқ йиғлагани ҳақида онасига телефон орқали хабар етказувчи ўзи тебранадиган бешик, уяли телефонга ўрнатилган дастур ёрдамида бошқариладиган гуманоид-робот ва бошқа бир неча техник ишланмалар лойиҳаси ҳамда макетини яратган.
Изоҳ (0)