Алишер Навоий номидаги Кино саройида «Ўзбекфильм» киностудиясида суратга олинган «Сариқ девни миниб» («Сеҳрли қалпоқча-2») тўлиқ метражли бадиий фильмининг премьераолди намойиши ва картина ижодкорлари иштирокида матбуот анжумани бўлиб ўтди. Бу ҳақда ЎзА хабар берди.
Матбуот анжуманида «Соғлом бола йили» Давлат дастури доирасида суратга олинган ушбу фильмнинг яратилиш жараёни ҳақида маълумот берилди.
Ўзбекистон халқ ёзувчиси Худойберди Тўхтабоевнинг «Сариқ девни миниб» романи болаларнинг энг севимли асарларидан саналади. Унда болаликнинг содда ва самимий, қувноқ ва завқли онлари зийрак ва теран нигоҳ, ўзига хос маҳорат билан очиб берилган. Шу боис мазкур асар дунёнинг кўплаб халқлари тилларига таржима этилиб, ўқувчилар меҳрини қозонган. Китобнинг биринчи қисми асосида суратга олинган «Сеҳрли қалпоқча» фильми ҳам ёш томошабинларга яхши таниш.
«Сариқ девни миниб» бадиий фильмида акс эттирилган воқеалар, аввало, китобда тилга олинган кулгига бой саргузаштларни томошабинлар ёдига солади. Тиниб-тинчимас, шўхлигидан ҳатто қўшнилар ҳам безор бўлган Ҳошимжонни бувиси «Боланинг ақли кирсин», деб қишлоқдаги Данак табибга дастёрликка беради. Ёзги таътил саргузаштларига дебоча бўлган бу воқеа сабаб табибнинг аслида ёлғончи, фирибгарлиги Ҳошимжоннинг саъй-ҳаракатлари билан фош бўлади.
Қувноқ саргузаштлару кутилмаган завқли эпизодларга бой бўлган ушбу картина кишини беихтиёр болаликнинг беғубор дамларига етаклайди.
Фильм сценарийси муаллифи ва режиссёри – Сарвар Каримов. Постановкачи оператор – Изатилла Лутфуллаев. Асосий ролларни Бунёд Раҳматуллаев, Шоҳруҳ Асадуллаев, Тоҳир Саидов, Муҳаммадисо Абдулхаиров, Фотима Режаметова, Дилбар Икромова сингари актёрлар ижро этган.
Эслатиб ўтамиз, замонавий фантастика жанрида «Сариқ девни миниб» («Сеҳрли қалпоқча–2») бадиий фильмини яратиш учун 600 млн сўм ажратилган эди.
Изоҳ (0)