Shavkat Mirziyoyev Navoiy shahridagi 22-son umumtaʼlim maktabida bo‘ldi. Bu haqda Prezident matbuot xizmati xabar berdi.
Mamlakatda maktab taʼlimi umummilliy harakatga aylanmoqda. “O‘zbekiston – 2030” strategiyasida ham taʼlim sohasi eng birinchi vazifa sifatida belgilangan.
1 800 nafarga yaqin o‘quvchi taʼlim-tarbiya olayotgan bu muassasa o‘tgan yili qurilib, foydalanishga topshirilgan. Barcha sinfxonalar, laboratoriya, kompyuter va xorijiy til xonalari, sport zali, futbol maydoni, oshxonada zamonaviy sharoitlar yaratilgan. Kutubxona 3 mingdan ortiq kitoblar bilan taʼminlanib, Alisher Navoiy nomidagi milliy kutubxona tizimiga ham ulangan.
Davlat rahbari tomonidan taʼlim sifatini Prezident va ixtisoslashtirilgan maktablarga yaqinlashtirish vazifasi qo‘yilgan. Shu maqsadda muassasaga 104 nafar o‘qituvchi bilimi va pedagogik mahorati bo‘yicha saralab ishga qabul qilingan. Darslar ham ilg‘or maktablar dasturi asosida olib borilmoqda.
Yoshlarga kamida ikkita chet tili va bitta zamonaviy hunar o‘rgatish jarayoni bu yerda ham izchil amalga oshirilmoqda. Buning uchun maktabda amaliy sanʼat, mehmonxona xizmati, rassomchilik, suratkashlik, IT yo‘nalishi, robototexnika kabi kasb-hunarlar bo‘yicha o‘ndan ortiq to‘garaklar tashkil etilgan.
Mudofaa vazirligi bilan hamkorlikda “Vatan tayanchi” harbiy vatanparvarlik guruhi tashkil etilgan. Unda Amir Temur, Jaloliddin Manguberdi kabi buyuk sarkardalar jasorati haqida muloqotlar bo‘ladi. Vatanparvarlik tadbirlari, sport musobaqalari tez-tez o‘tkaziladi.
“Ilmli bo‘lish, kasb-hunar egallash yaxshi. Qalbingizda vatanparvarlik kuchli bo‘lsa, shijoatingiz yanada baland bo‘ladi”, dedi prezident.
Maktabda “Iqtidor” klubi ham tashkil etilgan. Unda ijodkor o‘quvchilar musiqa, teatr va sanʼat yo‘nalishida turli mashg‘ulotlarda ishtirok etadi.
Prezident maktab faoliyati bilan tanishib, o‘qituvchi va o‘quvchilar bilan suhbatlashdi.
“Mening eng katta tashvishim, maqsadim — yoshlar tarbiyasi. Biz olgan marralar uchun bilimli avlod kerak. Buning uchun hamma sharoitlarni yaratishga harakat qilyapmiz. Sizlar esa vaqtning qadriga yetib, bor imkoniyatni ishga solib, o‘qishingiz kerak. Olgan bilimingiz, o‘rgangan kasb-hunaringiz kelajakda sizlarga qanot bo‘ladi”, dedi prezident bolalarga.
Taʼlim dargohida “xavfsiz maktab” tizimi ishlaydi. Buning uchun muassasaga kirish-chiqishda Face ID dasturi qo‘yilgan. Shuningdek, quyosh panellari o‘rnatilgan.
Izoh (0)