Tarmoqlarda Toshkent viloyatida kobra ilon boquvchi shaxs xonadonidan 30 ta ilon qochib ketgani va ular yashash xonadonlarida chiqayotgani haqida xabarlar tarqaldi. “Daryo” muxbiri kobra ilon topilgan “Darxon” mahallasida bo‘lib, holatni o‘rgandi.
“Daryo” muxbiri bilan suhbatlashgan fuqaroning aytishicha, ular bitta kobra ilonni ushlashga muvaffaq bo‘lgan, ammo 1,5 metrlisi qochib ketgan.
1-oktyabr kuni soat 13:30 larda o‘g‘lim Junariq bo‘yida katta, bir yarim metr atrofida keladigan kobra ilonni ko‘rgan. Ilonga 5-6 marta tosh otganda, pastga terakzorlarga, o‘tinlarni ichiga qochib kirib ketgan. Undan oldin mahallamiz bolalarining buzog‘iga tashlanganida bazo‘r ajratib olgan ekan. Tushlikdan keyin qo‘ni-qo‘shnilar bilan qidirganimizda jiydani tagiga qochib ketdi.
Ikkinchi kobrani qo‘shnilarimiz yo‘ldan ushlab mahallamizning profilaktika inspektoriga berib yubordi. Zooparkka olib ketishdi. Shu holatlar bo‘layapti, shuning uchun bunga qaraydigan mutasaddilar bo‘lsa shu tomondan yordam berishsa, bu ilonni olib ketishadimi, nima qiladi?
Bu zaharli ilon, uning ko‘rinishi, vajohati, turishining o‘zi qo‘rqinchli. Yosh bolalarimiz bor, qo‘ni-qo‘shnilarimiz, dehqonchilik bilan shug‘ullanamiz, dedi darxonlik Doniyor Almatov.
Uning taxmin qilishicha, kobralarni kimdir tashlab ketgan bo‘lishi mumkin.
Shu paytgacha bu atrofda bunaqa ilonlar bo‘lmagan. Biz birinchi marta ko‘ryapmiz va tahlikaga tushyapmiz.
Bu yerga qo‘shni tumandan ilon boqish bilan shug‘ullanadigan odamni olib kelishdi. U odam “Yo‘q meniki emas deb” bo‘yniga olmay turibdi, dedi u.
Toshkent viloyati Ekologiya boshqarmasi tomonidan berilgan ma’lumotga ko‘ra, holatni bartaraf etishga qaratilgan mas’ul tashkilotlardan iborat ishchi guruh tuzilgan.
Aniqlanishicha, “Tuyabo‘g‘iz” MFY hududida yashovchi 1980-yilda tug‘ilgan fuqaro N.Yu. o‘zi yashayotgan xonadonda 30 dan ortiq Osiyo kobra ilonlarini tegishli ruxsatnomalarsiz saqlab kelgan. Noma’lum sabablarga ko‘ra, fuqaro N.Yu. xonadonida saqlanayotgan ilonlar ochiqqa qo‘yib yuborilgan. Bu holat mahalliy aholi tomonidan aniqlanib, ikkita kobra iloni tutib o‘ldirilgan.
Qayd etilishicha, hozirda ishchi guruh tomonidan shu yaqin atrofda yashovchi aholi xonadonlarida dorilash ishlari olib borilib uy hayvonlarini vaqtincha tutqunlikda saqlab turish bo‘yicha tushuntirish ishlari olib borilmoqda.
Fuqaroga nisbatan IIB xodimlari tomonidan dastlabki surishtiruv ishlari olib borilmoqda.
FVV O‘zbekistonda tarqalgan zaharli ilonlar haqida bergan ma’lumotga ko‘ra, Kobra — O‘zbekistondagi yirik zaharli ilonlardan biridir, tanasining uzunligi 125 sm, dumi 45 sm gacha. Rangi tana rangidan to‘q sariq, qo‘ng‘ir yoki qoragacha kuchli darajada o‘zgarib turadi. Ostki tomoni oq va tanasining oldingi tomonida ikki-uchta qora ko‘ndalang yo‘llari bor.
Izoh (0)