Тармоқларда Тошкент вилоятида кобра илон боқувчи шахс хонадонидан 30 та илон қочиб кетгани ва улар яшаш хонадонларида чиқаётгани ҳақида хабарлар тарқалди. “Дарё” мухбири кобра илон топилган “Дархон” маҳалласида бўлиб, ҳолатни ўрганди.
“Дарё” мухбири билан суҳбатлашган фуқаронинг айтишича, улар битта кобра илонни ушлашга муваффақ бўлган, аммо 1,5 метрлиси қочиб кетган.
1 октябрь куни соат 13:30 ларда ўғлим Жунариқ бўйида катта, бир ярим метр атрофида келадиган кобра илонни кўрган. Илонга 5-6 марта тош отганда, пастга теракзорларга, ўтинларни ичига қочиб кириб кетган. Ундан олдин маҳалламиз болаларининг бузоғига ташланганида базўр ажратиб олган экан. Тушликдан кейин қўни-қўшнилар билан қидирганимизда жийдани тагига қочиб кетди.
Иккинчи кобрани қўшниларимиз йўлдан ушлаб маҳалламизнинг профилактика инспекторига бериб юборди. Зоопаркка олиб кетишди. Шу ҳолатлар бўлаяпти, шунинг учун бунга қарайдиган мутасаддилар бўлса шу томондан ёрдам беришса, бу илонни олиб кетишадими, нима қилади?
Бу заҳарли илон, унинг кўриниши, важоҳати, туришининг ўзи қўрқинчли. Ёш болаларимиз бор, қўни-қўшниларимиз, деҳқончилик билан шуғулланамиз, деди дархонлик Дониёр Алматов.
Унинг тахмин қилишича, кобраларни кимдир ташлаб кетган бўлиши мумкин.
Шу пайтгача бу атрофда бунақа илонлар бўлмаган. Биз биринчи марта кўряпмиз ва таҳликага тушяпмиз.
Бу ерга қўшни тумандан илон боқиш билан шуғулланадиган одамни олиб келишди. У одам “Йўқ меники эмас деб” бўйнига олмай турибди, деди у.
Тошкент вилояти Экология бошқармаси томонидан берилган маълумотга кўра, ҳолатни бартараф этишга қаратилган масъул ташкилотлардан иборат ишчи гуруҳ тузилган.
Аниқланишича, “Туябўғиз” МФЙ ҳудудида яшовчи 1980 йилда туғилган фуқаро Н.Ю. ўзи яшаётган хонадонда 30 дан ортиқ Осиё кобра илонларини тегишли рухсатномаларсиз сақлаб келган. Номаълум сабабларга кўра, фуқаро Н.Ю. хонадонида сақланаётган илонлар очиққа қўйиб юборилган. Бу ҳолат маҳаллий аҳоли томонидан аниқланиб, иккита кобра илони тутиб ўлдирилган.
Қайд этилишича, ҳозирда ишчи гуруҳ томонидан шу яқин атрофда яшовчи аҳоли хонадонларида дорилаш ишлари олиб борилиб уй ҳайвонларини вақтинча тутқунликда сақлаб туриш бўйича тушунтириш ишлари олиб борилмоқда.
Фуқарога нисбатан ИИБ ходимлари томонидан дастлабки суриштирув ишлари олиб борилмоқда.
ФВВ Ўзбекистонда тарқалган заҳарли илонлар ҳақида берган маълумотга кўра, Кобра — Ўзбекистондаги йирик заҳарли илонлардан биридир, танасининг узунлиги 125 см, думи 45 см гача. Ранги тана рангидан тўқ сариқ, қўнғир ёки қорагача кучли даражада ўзгариб туради. Остки томони оқ ва танасининг олдинги томонида икки-учта қора кўндаланг йўллари бор.
Изоҳ (0)