Sog‘liqni saqlash vazirligi jazirama tufayli aholini allergik reaksiyalar paydo bo‘lishidan ogohlantirdi.
Qayd etilishicha, issiq kunlarda yuqori darajadagi ultrabinafsha nurlanish teri kasalliklari va allergik reaksiyalarni keltirib chiqarishi mumkin. Respublika ixtisoslashtirilgan allergologiya va klinik immunologiya ilmiy-amaliy tibbiyot markazi direktori Ilmira Razikovaning so‘zlariga ko‘ra, ultrabinafsha nurlar teridagi moddalar bilan o‘zaro ta’sirga kirishib, “fotodermatoz” deb nomlanuvchi xastalikni yuzaga keltiradi.
Bu kasallik ko‘krak, bo‘yin va qo‘l sohalarida toshmalar, qizil dog‘lar, qavariqlar, qichishish va shishlar ko‘rinishida namoyon bo‘ladi. Fotodermatoz odatda quyoshga chiqqan ilk soatlardan boshlab bir haftagacha namoyon bo‘lishi mumkin. Kasallik o‘z vaqtida davolansa, asoratlarsiz o‘tadi, ammo ayrim hollarda surunkali shaklga o‘tishi ham ehtimoldan xoli emas.
Mutaxassislar quyoshdan himoyalanish uchun quyidagi tavsiyalarni bermoqda:
- soat 10:00 dan 16:00 gacha ochiq quyosh ostida yurmaslik, soyali joylarda bo‘lish;
- yopiq, yengil kiyimlar kiyish;
- teriga maxsus quyoshdan himoyalovchi krem surtish;
- fotosensitivlikni kuchaytiradigan dorilarni qabul qilishda ehtiyot bo‘lish.
Keltirilishicha, eritromisin, tetrasiklin va streptomisin kabi preparatlar ultrabinafsha nurlarni yutish xususiyatiga ega. Ularni qo‘llagan bemorlarga issiq kunlarda quyosh nuri ta’siridan saqlanish tavsiya etiladi.
O‘zbekistonda so‘nggi kunlarda kuzatilayotgan issiq ob-havo muhiti aksar aholi uyqusiga salbiy taʼsir qilmoqda. Bu haqda iqlimshunos Erkin Abdulahatov o‘z Telegram kanalida o‘tkazgan so‘rov natijasidan kelib chiqib fikr bildirdi. Iyul oyida O‘zbekistonda jazirama kunlar, anomal issiq havo avvalgi davrlarga nisbatan uzoq davom etayotgani aytilmoqda. Hatto tungi vaqtda ham havo sezilarli issiq bo‘lmoqda. Kunduz kunlari +40 darajadan yuqori haroratli soatlar o‘tmishdagidan ko‘proq. Erkin Abdulahatov fikricha, mamlakatda yangicha iqlimiy davr boshlanyapti.
“O‘zgidromet” joriy yil 23–27-iyul kunlari respublikada harorat biroz pasayishini prognoz qildi. Jumladan, 23-iyul kuni kunduzi havo 38-40 daraja, 24-25-iyulda 37-42 daraja, 26-27-iyul kunlari 33-38 daraja issiq bo‘lishi kutilmoqda.
Izoh (0)