Qarshidagi korxona gardaniga elektr energiyasidan qariyb 185 million so‘mlik asossiz qarzdorlik “ilindi”. Bu haqda 30-iyul kuni Raqobat qo‘mitasi xabar berib, holat yuzasidan tadbirkor huquqi himoya qilinganini bildirdi.
Qashqadaryo viloyati Qarshi shahrida faoliyat yurituvchi “Gidrobionika” MCHJ “Hududiy elektr tarmoqlari”AJning “Energiyasavdo” filiali bo‘linmasi faoliyatidan norozi bo‘lib, Raqobat qo‘mitasiga murojaat qilgan.
Jarayon o‘rganilganda tadbirkor kommunal to‘lovlarni doimiy ravishda, o‘z vaqtida to‘lab kelayotgani aniqlangan. Elektr taʼminoti korxonasi xodimlari esa unga elektron tizimga texnik xatolik sabab kiritilgan maʼlumotlar asosida 185 million so‘mdan ortiq noreal qarzdorlik chiqargan.
Qo‘mita xizmat ko‘rsatuvchi tashkilotga nisbatan “Raqobat to‘g‘risida”gi qonun talablari buzilishi yuzasidan ish qo‘zg‘atgan. Yakuniy chora sifatida tadbirkorga asossiz hisoblangan qarzdorlik hisobdan chiqarilishi taʼminlangan.
“Raqobat to‘g‘risida”gi qonunning 18-moddasiga ko‘ra, ustun mavqega ega korxona yoki bir guruh shaxslar raqobatni cheklashi yoki isteʼmolchilar huquqlarini kamsitishi taqiqlanadi. Yaʼni moddada raqobatga qarshi har qanday harakat man etilishi yozilgan.
Izoh (0)