Toshkent viloyatida yuzlarini yashirgan uch kishi to‘lov terminalini o‘g‘irladi. Holat aks etgan video ijtimoiy tarmoqlarda tarqaldi.
“Millar” dasturida xabar qilinishicha, voqea 15-iyul kuni soat 02:46 atrofida yuz bergan. Uch kishi davlat raqamlari yechilgan Captiva avtomobilida do‘kon oldiga kelgan. Ular mashinadan tushib, to‘lov terminalini demontaj qilib, avtomobil saloniga yuklagan va voqea joyidan yashiringan. Hodisa do‘kon yonida o‘rnatilgan kuzatuv kamerasiga tushib qolgan.
Toshkent viloyati IIBB matbuot xizmati holat yuzasidan Jinoyat kodeksining 169-moddasi (o‘g‘rilik) 3-qismi “v” bandi bilan jinoyat ishi qo‘zg‘atilib, tergov-surishtiruv harakatlari olib borilayotganini ma’lum qildi.
Jinoyat kodeksiga ko‘ra, bir guruh shaxslar tomonidan oldindan til biriktirib o‘g‘rilik sodir etish BHMning 300 baravarigacha miqdorda jarima yoki 2 yildan 3 yilgacha axloq tuzatish ishlari yoki 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanadi.
Shu kabi holat bir necha yil avval Toshkent viloyati O‘rta Сhirchiq tumanida sodir bo‘lgandi. Uch kishi 145 million so‘mlik bankomatni o‘g‘irlab, ichidan ichidan pul chiqmagach, daryoga oqizib yuborgandi.
Izoh (0)