Toshkent viloyatining Nurafshon shahri markazida joylashgan bankomatlardan birida pul o‘g‘irlagan shaxslar qo‘lga olindi, deb xabar beradi viloyati IIBB axborot xizmati.
Ma’lum qilinishicha, 2021-yilning 11-dekabr kuni tungi soat 02:30 larda bir guruh noma’lum shaxs (yuziga niqob va qo‘liga qo‘lqop kiygan holda temir moslama bilan qurollanib) Nurafshon shahar markazida o‘rnatilgan “Poytaxtbank” AJga qarashli bankomatlarning biriga hujum qilgan. Ular kodli seyfni buzish orqali bankomat ichidan jami 19 million 433 ming so‘m miqdoridagi pullarni olib (bankomat ichida yana 180 million so‘m pul bo‘lgan), voqea joyidan yashiringan.
Holat yuzasidan Nurafshon shahar IIB xodimlari tomonidan olib borilgan tezkor-qidiruv tadbiri davomida ushbu jinoyatni – O‘rta Chirchiq, Bektemir tumanlari hamda Nurafshon shahrida yashovchi 22-24 yosh orasidagi 5 nafar shaxs sodir qilgani aniqlanib, ular Jinoyat-protsessual kodeksining 221-moddasi (ushlab turish asoslari) tartibida ushlangan.
Surishtiruv davomida ushbu shaxslar 13-dekabr kuni ham shahar markazidagi oziq-ovqat do‘konini oldiga o‘rnatilgan Paynet to‘lov terminalini buzib, ichida bo‘lgan pulni olmoqchi bo‘lgani, biroq ularning bu harakati natija bermagani aniqlangan.
Jinoyatni sodir etgan shaxslar tomonidan foydalanilgan buyum va daliliy ashyolar belgilangan tartibda olinib, Nurafshon shahar IIB Tergov bo‘limi tomonidan ushlangan shaxslarga nisbatan Jinoyat kodeksining 25- (jinoyatga tayyorgarlik ko‘rish va jinoyat sodir etishga suiqasd qilish), 169-moddasi (o‘g‘rilik) 3-qismi bilan jinoyat ishi qo‘zg‘atilgan.
Avvalroq Toshkentda bankomatdan qariyb 400 mln so‘m o‘g‘irlagan bir guruh shaxslar qo‘lga olingani, Toshkentning “Aviasozlar” dahasidagi bankomatlardan birini buzib, ichidan 165 million so‘m o‘g‘irlagan 24 yoshli shaxs ushlangani haqida xabar berilgan edi.
Izoh (0)