Toshkent viloyati O‘rta Сhirchiq tumanida “Kapitalbank” ATBga tegishli bankomatni o‘margan shaxslar qo‘lga olindi. Bu haqda Tergov departamenti xabar qildi.
Qayd etilishicha, bank amaliyot boshqaruvchisi O‘rta Сhirchiq tuman Ichki ishlar bo‘limiga ariza bilan murojaat qilgan. Unda 26-yanvar kuniga o‘tar kechasi noma’lum shaxs tomonidan O‘rta Сhirchiq tumani Toshkent yo‘li ko‘chasiga o‘rnatilgan 145 million so‘mlik bankomat o‘g‘irlab ketilgani haqida ma’lum qilgan. Xodim ushbu noma’lum shaxsni aniqlab, unga nisbatan qonuniy chora ko‘rishni so‘ragan.
Holat yuzasidan Jinoyat kodeksning 169-moddasi 4-qismi “a” bandi (juda ko‘p miqdorda o‘g‘rilik) bilan jinoyat ishi qo‘zg‘atilgan.
Olib borilgan tergov-tezkor harakatlari natijasida jinoyat shu tumanida yashovchi E.A. (24 yoshli), S.N. (22 yoshli) va Y.D. (23 yoshli) tomonidan bir guruh bo‘lib sodir etilgani aniqlangan.
Tergov davomida qonunbuzarlardan mazkur bankomatni qayerga yashirganlari so‘ralgan. Ular bankomatni temir jism yordamida buzib ochganini, biroq bankomat ichida pul bo‘lmagani sababli uni Toshkent shahar Bektemir tuman hududidan oqib o‘tuvchi Chirchiq daryosiga tashlab yuborganini ma’lum qilgan.
Hozirda ushbu shaxslarning boshqa jinoyatlarga aloqadorligi tekshirilmoqda.
Izoh (0)