Davlat xavfsizlik xizmati Namangan viloyati boshqarmasi va viloyat ichki ishlar organlari tomonidan o‘tkazilgan tezkor tadbirlarda “Islom davlati” terroristik tashkiloti g‘oyalari ta’siriga tushgan 21 nafar shaxs qo‘lga olindi. Bu haqda DXX matbuot xizmati xabar berdi.
Jamoatning yetakchisi, Pop tumani “Yangiobod” mahallasida istiqomat qiluvchi fuqaro ijtimoiy tarmoqlarda noqonuniy kanallar yaratib, unga “Islom davlati” terroristik tashkiloti g‘oyalarini targ‘ib qiluvchi materiallarni tarqatib kelgan. Aniqlanishicha, ushbu fuqaro ijtimoiy tarmoqlardan foydalanish davomida ayni paytda Janubiy Koreyada mavsumiy ishlab kelayotgan Farg‘ona viloyati Uchko‘prik tumanida ro‘yxatda turuvchi shaxs bilan tanishib, uning virtual ta’sirida terroristik tashkilotlar faoliyatiga jalb qilingan.
Ushbu shaxslar ota-onalarning roziligisiz shar’iy nikohdan o‘tgan holda, kelgusida jangovar harakatlar amalga oshirilayotgan o‘choqli hududlarga hijrat qilib ketishni rejalashtirgan. U o‘zining harakatlariga uzoq qarindoshi va mahalladoshini ham jalb qilgan. Ushbu fuqarolar ijtimoiy tarmoqlarda yashirin kanallar tashkil qilib, unga o‘zining yaqin qarindoshlari, mahalladoshlari hamda ekstremizmga moyil bo‘lgan shaxslarni a’zo qilib, ularga terroristik tashkilotlarining amalga oshirayotgan qo‘poruvchilik harakatlari, qatl sahnalari, qonli janglar, amaldagi davlat tuzumini kuch bilan ag‘darib tashlashga qaratilgan g‘oyalarni singdirib kelgan.
Men ijtimoiy tarmoqlarda “Islom davlati” terrorchilarining ta’siriga tushib qolib, o‘zimning Telegram’im orqali kanallar ochib, terrorchilarning qotilliklari aks etgan videolar, da’vatlari aks etgan videolar va darsliklarini tarqatganman. Terrorchilarning materiallari bilan tanishishimdan oldin Misrga hijrat qilib, u yerda ilm olib, so‘ng “Islom davlati” terrorchilari bilan birgalikda jihod qilishni maqsad qilgandim.
Men bu ishimdan afsusdaman. Agar menga imkon berilsa, kelgusida bu ishlardan uzoq yurishni, tarmoqlardan to‘g‘ri maqsadga foydalanishni, ota-onamga, xalqimga yaxshi xizmat qilishni va’da beraman va men kabi yoshlarni ijtimoiy tarmoqlardan to‘g‘ri foydalanishlarini so‘rab qolaman, degan qo‘lga olingan qizlardan biri.
Ushbu fuqarolar bir necha marotaba ogohlantirilgan, biroq ular o‘zlariga tegishli xulosa chiqarmasdan, o‘z faoliyatini maxfiy tarzda davom ettirib kelgan. Shunga qaramay ularning yashirin faoliyati uzoqqa bormadi. Tezkor tadbir davomida jamoat a’zolaridan diniy adabiyotlar, axborot tashuvchilar va boshqa ashyoviy dalillar tegishli tartibda xolislar ishtirokida protsessual tartibda rasmiylashtirib olindi.
Tadbir natijasida jamoatning namanganlik to‘rt nafar yetakchisiga nisbatan Jinoyat kodeksining 244-1 (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) va 244-2-moddalari (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan jinoyat ishi qo‘zg‘atilib, ularning ikki nafariga qamoq ehtiyot chorasi qo‘llanilgan. Qolgan 17 nafar a’zolarga nisbatan tergov harakatlari davom ettirilmoqda.
Iyul oyining oxirlarida Andijon viloyatida 28 yoshli xalqaro terroristik tashkilot tarafdori 8 yil 6 oyga ozodlikdan mahrum qilingandi.
Izoh (0)