Andijon viloyatida 28 yoshli xalqaro terroristik tashkilot tarafdori 8 yil 6 oyga ozodlikdan mahrum qilindi. Bu haqda Davlat xavfsizlik xizmati xabar berdi.
Qayd etilishicha, viloyatning Andijon tumanida yashovchi, 1997-yilda tug‘ilgan fuqaro 2023-yildan boshlab “Tavhid va jihod katibasi” xalqaro terroristik tashkilotining media targ‘ibotchilari ta’siriga tushib, tashkilotning “hijrat” va “jihod” qilishga, “shahid” ketishga da’vat qiluvchi, diniy aqidaparastlikni targ‘ib qiluvchi g‘oyalarini qo‘llab-quvvatlab, materiallarini ijtimoiy tarmoqdagi profillari orqali tarqatgan.
XTT a’zolari bilan doimiy aloqaga kirishib, tashkilot safida “jihod” amalini bajarish orqali qurolli to‘qnashuvlar va terroristik harakatlarda ishtirok etishni rejalashtirgan.
Bundan tashqari, ushbu fuqaro XTT a’zolariga bevosita moliyaviy yordam ko‘rsatish maqsadida muntazam ravishda pul mablag‘larini jo‘natgan. Xususan, 2023—2024-yillar davomida umumiy hisobda kriptovalyuta orqali 2912 AQSH dollari va bank kartalari orqali 4 million 190 ming so‘m pul yuborgan.
Keyinchalik, 2023—2024-yillarda Suriyadagi terrorchilik faoliyatida ishtirok etish uchun Qirg‘iziston orqali ikki marotaba Turkiyaga borgan. Ammo ushbu davlatga o‘tishning imkoni bo‘lmagach, XTT a’zosining ko‘rsatmasi bilan Afg‘onistonga borib, “Islom jihodi ittihodi” xalqaro terroristik tashkiloti safiga qo‘shilishni reja qilgan. Eron orqali Afg‘onistonga o‘tishga uringan ushbu shaxsning rejasi oxiriga yetmay, 2024-yilning noyabr oyida qo‘lga olingan.
Jinoyat ishlari bo‘yicha Andijon tumani sudi tomonidan mazkur fuqaro Jinoyat kodeksining 155-2-moddasi (terrorchilik faoliyatini amalga oshirish maqsadida o‘quvdan o‘tish, chiqish yoki harakatlanish) 1-qismi, 155-3-moddasi (terrorizmni moliyalashtirish) 2-qismi “a” bandi, 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi va 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 1-qismida nazarda tutilgan jinoyatlarni sodir etganlikda aybdor deb topilib, 8 yil 6 oy muddatga ozodlikdan mahrum qilish jazosi tayinlandi.
2024-yil noyabrida Qo‘qonda “Tavhid va jihod katibasi” xalqaro terroristik tashkiloti tarafdorlari bo‘lgan shaxslar 6 yildan 12 yilgacha ozodlikdan mahrum etilgandi. 2025-yil 19-iyulida Namangan shahrida xalqaro terroristik tashkilot tarafdorlaridan iborat noqonuniy guruh fosh etildi.
Izoh (0)