Shavkat Mirziyoyev 8-noyabr kuni “Yevropa tiklanish va taraqqiyot banki ishtirokida Xorazm viloyatidagi umumiy foydalanishdagi avtomobil yo‘llarini rekonstruksiya qilish va rivojlantirish chora-tadbirlari to‘g‘risida”gi qarorni imzoladi.
Qarorga ko‘ra, 2024—2029-yillarda umumiy qiymati 294,1 mln AQSH dollari bo‘lgan D 213 “Urganch — Xonqa — Hazorasp — Amudaryo daryosi — A380” avtomobil yo‘lining 0 — 84 km qismini rekonstruksiya qilish nazarda tutilgan.
Loyihada YTTBning ulushi 238,0 mln AQSH dollarini, O‘zbekistonning ulushi 56,1 mln dollarni tashkil etadi. Ajratilgan qarzlarni qaytarish, foiz va boshqa to‘lovlar bo‘yicha xarajatlar 4 yillik imtiyozli davrni o‘z ichiga oluvchi 18 yil muddat davomida respublika byudjeti mablag‘lari hisobidan amalga oshiriladi.
Avtomobil yo‘llari qo‘mitasi va uning tarkibidagi “Avtoyo‘linvest” agentligi loyihani o‘z vaqtida sifatli amalga oshirish hamda YTTB qarzidan maqsadli va samarali foydalanish bo‘yicha mas’ul ijro etuvchi organ hisoblandi.
Qaror bilan loyiha doirasida maqbullashtiriladigan va iqtisod qilinadigan mablag‘lar hisobiga Xorazm viloyatidagi D 217 “Urganch — Gurlan — Mang‘it — Turkmaniston Respublikasi chegarasi” avtomobil yo‘lining 5 — 75 km qismini qayta qurish loyihasiga yo‘naltirilishi ko‘zda tutilgan.
Shuningdek, rekonstruksiya qilinadigan avtomobil yo‘llarining yo‘l bo‘yi mintaqalarida iqlim sharoitlarini hisobga olgan holda 30 ming dona manzarali daraxt va butalar ekilishi belgilangan.
Qayd etish lozim, bu strategik muhim yo‘l Urganchni Qozog‘istonga A380 yo‘li bilan bog‘lovchi transport tarmog‘ining bir qismi va Markaziy Osiyo mintaqaviy iqtisodiy hamkorligining 2-yo‘lagi hisoblanadi.
Qurilish ishlari tugallangach, hozirgi bir qatorli 2-toifali yo‘l ikki qatorli 1-toifali avtomobil yo‘liga aylanadi.
Avvalroq may oyida YTTB Xorazm viloyatidagi yo‘lni modernizatsiya qilish uchun 238 mln dollar kredit ajratgani ma’lum qilingandi.
Izoh (0)