Oliy Majlis Senatining parlament saylovidan keyingi birinchi majlisida Senat raisi va uning o‘rinbosarlarini saylash to‘g‘risidagi tashkiliy masala ko‘rib chiqildi.
Konstitutsiyaning 101-moddasiga muvofiq, prezident Oliy Majlis Senati raisi lavozimiga senator Tanzila Norboyeva nomzodini taqdim etdi.
Tanzila Norboyeva davlat va jamoat boshqaruvida boy tajribaga ega ekani, o‘tgan davrda shu lavozimdagi samarali faoliyati natijasida mamlakatimizda xotin-qizlar, bolalar huquqlarini ta’minlash va ularning qonuniy manfaatlarini himoya qilish bo‘yicha vaziyat sezilarli ravishda yaxshilangani ta’kidlandi.
Shuningdek, Senat raisi birinchi o‘rinbosari lavozimiga senator Sodiq Safoyev, Senat raisi o‘rinbosari lavozimiga senator Amanbay Orinbayev nomzodlari tavsiya etildi.
Tanzila Norboyeva 2019-yil 20-iyundan prezident tomonidan Senat aʼzosi etib tayinlangan, 21-iyun kuni Senat raisi etib saylangandi. Sodiq Safoyev 2016-yildan buyon Senat raisining birinchi o‘rinbosari lavozimida faoliyat yuritib kelayotgandi.
Yangilangan konstitutsiyaga ko‘ra, endilikda senatorlar soni 65 nafarni tashkil etadi. Ular Qoraqalpog‘iston, viloyatlar va Toshkent shahridan teng miqdorda — 4 nafardan (ilgari 6 nafardan) saylanadi. Senatning yana 9 nafar a’zosi (ilgari 16) fan, san’at, adabiyot, ishlab chiqarish hamda davlat va jamiyat faoliyatining boshqa sohalarida katta amaliy tajribaga ega bo‘lgan eng obro‘li fuqarolar orasidan prezident tomonidan tayinlanadi.
Senat yangidan shakllangach, prezidentning 2024-yil 16-noyabrdagi farmoni bilan Sodiq Safoyev Senat a’zosi etib tayinlangandi.
Izoh (0)