AQSH senatorlari 13-iyul kuni prezident Donald Trampga Rossiyaga qarshi keskin sanksiyalar kiritish to‘g‘risida taklif berdi. Unda Moskvaga yordam beradigan davlatlarga 500 foizlik boj solish nazarda tutilmoqda. Bu haqda Arab News xabar berdi.
AQSH senati Moskvaga keskin sanksiya kiritish borasida yangi qonun loyihasini ham imzolagan. Respublikachi senator Lindsi Grem ushbu loyihani Senatda ko‘pchilik qo‘llab-quvvatlaganini bildirgan. Sanksiyalar Rossiya iqtisodiyoti va Putinni qo‘llab-quvvatlayotgan barcha mamlakatlarni nishonga olishi aytilgan.
“Biz ko‘rib chiqayotgan ushbu sanksiya paketi Rossiyaga yordam beradigan har qanday davlatga 500 foizlik bojlar joriy etishni nazarda tutadi. Bu Xitoy, Hindiston yoki Braziliya kabi Rossiya tovarlarini sotib oladigan mamlakatlarni o‘z ichiga olishi mumkin. Bundan boyog‘iga qaror qabul qilish prezidentning ixtiyorida”, dedi Grem.
Tramp rossiyalik hamkasbi Vladimir Putin bilan munosabatlar tobora “sovuqlashib” borayotgani sababli sanksiyalar to‘g‘risidagi qonun loyihasiga ochiqligini bildirgan. U 14-iyul kuni “Rossiya bo‘yicha katta bayonot” berishini ma’lum qilgan.
AQSH prezidenti so‘nggi 6 oy davomida Putinni urushni to‘xtatishga undab kelmoqda. Ammo uning sabri so‘nggi kunlarda tugab borayotganga o‘xshaydi. Sababi u Putindan “hafsalasi pir bo‘lganini” bir necha bor ta’kidlagan.
O‘tgan hafta Tramp Ukrainaga ko‘proq qurol-yarog‘ yuborishini va Kiyev qurollarini sotib olishiga rozi bo‘lganini ma’lum qilgandi. AQSH prezidenti senatning sanksiyalar to‘g‘risidagi qarori haqida shunday dedi:
“Ular juda yirik va keskin sanksiyalar to‘g‘risida qonun loyihasini qabul qilmoqchi. Ammo buni amalga oshirish haqida qaror qabul qilish prezidentga bog‘liq. Uni intizorlik bilan kutyapman”.
Ushbu sanksiyalar borasida Ukraina prezidenti Vladimir Zelenskiy X’da shunday post qoldirgan:
“Shubhasiz, bu tinchlikka yo‘l ochib, diplomatiya bo‘sh emasligini isbotlaydi”.
Izoh (0)